बीड : मस्साजोग सरपंच हत्याप्रकरण, दोन कोटी रुपये खंडणीच्या गुन्ह्यातील वाल्मीक कराड, सुदर्शन घुलेसह इतर आठ जणांवर खंडणी, हाफ मर्डरसह इतर गंभीर गुन्हे दाखल आहेत. घुलेविरोधात यापूर्वीही अपहरण केल्याची नोंद आहे. यावरून हे सर्व गुन्हेगार सराईत असल्याचे सिद्ध झाले आहे
.
मस्साजोग येथील सरपंच संतोष देशमुख यांची ९ डिसेंबर रोजी अपहरण करून हत्या करण्यात आली होती. यामध्ये सुदर्शन घुलेसह आठ आरोपी आतापर्यंत निष्पन्न झाले आहेत. तर आवादा कंपनीच्या अधिकाऱ्याला दोन कोटी रुपयांची खंडणी मागितल्याच्या प्रकरणात मंत्री धनंजय मुंडे यांचे निकटवर्तीय वाल्मीक कराडसह तिघांविरोधात गुन्हा दाखल आहे. या सर्व गुन्ह्यांचा तपास सध्या सीआयडी करत आहे.
हिवाळी अधिवेशनात या प्रकरणावरून गदारोळ झाला होता. त्यानंतर मुख्यमंत्री देवेंद्र फडणवीस यांनी या प्रकरणातील आरोपींवर कठोर कारवाईचे आश्वासन दिले होते. त्यांच्याविरोधात मोक्का अंतर्गत कारवाई करण्याची ग्वाहीही दिली होती.
वाल्मीक कराडविरोध १५ गुन्हे दाखल आहेत. असे असतानाही त्याला शस्त्र परवाना देण्यात आलेला आहे. तसेच दोन शासकीय बॉडीगार्डही आहेत. तीन महिन्यांसाठी त्याने ९ लाख ७२ हजार रुपये शुल्कही भरले होते.
पवन ऊर्जा प्रकल्पाच्या अधिकाऱ्यास खंडणी मागितल्याप्रकरणी वाल्मीक कराड याची बीड शहर पोलिस ठाण्यात सीआयडीच्या अधिकाऱ्यांकडून चौकशी सुरू आहे.या चौकशीदरम्यान कराड अस्वस्थ होत आहे. पाठीत जास्त दुखत असल्याचे कराड याने वैद्यकीय अधिकाऱ्यांना सांगितले. वैद्यकीय अधिकारी डॉ. सानप यांनी तपासणी करून त्याला गोळ्या, औषध दिले.
