पुणे: सावित्रीबाई फुले यांच्या जयंतीच्या (३ जानेवारी) निमित्ताने पुण्यात त्यांच्या पुतळ्याचे अनावरण करण्यात आले. या कार्यक्रमानिमित्त शरद पवार आणि छगन भुजबळ एकाच मंचावर पाहायला मिळाले. या कार्यक्रमादरम्यान शरद पवार यांनी कार्यक्रम पत्रावर काहीतरी लिहून छगन भुजबळ यांच्या हाती दिले. भुजबळांनीही ते वाचले. मात्र शरद पवार यांनी भुजबळांना काय लिहून दिले? याची चर्चा सुरू झाली.
छगन भुजबळ यांनी आज पत्रकार परिषद घेऊन विविध राजकीय विषयांवर भाष्य केले आहे. या परिषदेत त्यांना ३ जानेवारी रोजी शरद पवारांनी कागदावर काय लिहून दिले? याबद्दल प्रश्न विचारण्यात आला. यावर उत्तर देताना भुजबळांनी म्हटले, “पर्दे मे रहने दो, पर्दा न उठाओ”, हे सांगून छगन भुजबळ यांनी पत्रकार परिषदेत हशा पिकवला. मात्र पवारांनी नेमके काय लिहिले होते, यावर मात्र त्यांनी बोलणे टाळले.
राष्ट्रवादी काँग्रेस (शरद पवार) पक्षाचे अध्यक्ष शरद पवार यांनी कार्यक्रमाच्या पत्रिकेवर एक संदेश लिहिला. तो संदेश त्यांनी भूजबळ यांची हाती दिला आणि त्यांच्या हातातील पत्रिका स्वतःच्या हातात घेतली. छगन भुजबळ यांनी हा संदेश वाचला. काही सेकंद दोघांचा संवाद झाला आणि दोन्ही नेते हसूही लागले. दरम्यान दोन दिग्गज नेत्यांच्या कृतीमुळे राजकीय वर्तुळात विविध चर्चा रंगू लागल्या आहेत.
छगन भुजबळ यांनी शरद पवार यांचे कौतुक केले. ते म्हणाले, “समता परिषदेच्या सभेत आम्ही शरद पवार यांच्याकडे मंडल आयोगाची शिफारस करण्याची मागणी केली होती. त्याची अंमलबजावणी पवार साहेबांनी केली. शरद पवार यांनी मराठवाडा विद्यापीठाचे नाव बदलले.”
