माणदेश एक्सप्रेस न्युज
आटपाडी/प्रतिनिधी : इतिहासकार इंद्रजित सावंत यांना फोनवरून धमकी देवून, छत्रपती शिवाजी महाराज यांच्या बद्दल संतापजनक वक्तव्य करणाऱ्या प्रशांत कोरटकर या व्यक्तीच्या प्रतिमेस जोडो मारो आंदोलन करण्यात आले. तसेच सदर व्यक्तीवर कठोर कायदेशीर कारवाई करण्याची मागणी आटपाडी मराठा सेवा संघाच्या वतीने करण्यात आली आहे.
आटपाडी नगरपंचायत समोर सदरचे जोडो मारो आंदोलन करण्यात आले. यावेळी शरद पवार, तानाजी निकम, उदय पाटील, जितेंद्र जाधव, बी.ए. पाटील, गौरीहर पवार, अजित कदम, शिवाजी पाटील, बापू कदम, अनिल सूर्यवंशी, श्रेयस पाटील, नारायण कदम, दौलत पाटील, संभाजी देशमुख उपस्थित होते.
यावेळी आंदोलनी पोलिसांना निवेदन दिले आहे. प्रशांत कोरटकर (नागपूर) या व्यक्तीने इतिहास संशोधक इंद्रजीत सावंत यांना फोन कॉल करून छत्रपती शिवाजी महाराज, छत्रपती संभाजी महाराज व माँसाहेब जिजाऊ यांच्याबद्दल हिणकस व गलिच्छ वक्तव्ये करून बदनामी केली आहे. तसेच संबंधित व्यक्तीने विकृत लेखक जेम्स लेन याने केलेल्या छत्रपती शिवाजी महाराज आणि माँसाहेब जिजाऊ यांच्याबद्दलच्या अत्यंत विकृत लिखाणाचे समर्थन करून तमाम शिवप्रेमींच्या भावना दुखावल्या आहेत. मराठा समाजाला शिवीगाळ करून सामाजिक तेढ निर्माण करण्याचा प्रयत्न केला आहे. तसेच इतिहास संशोधक इंद्रजीत सावंत यांना जीवे मारण्याची धमकी दिली आहे. महाराष्ट्राच्या मुख्यमंत्र्यांचे नाव घेऊन सदर व्यक्तीने ही वक्तव्ये व धमकी देत असल्याने हे प्रकरण सवेदनशील आहे.
त्यामुळे प्रशांत कोरटकर (नागपूर) या व्यक्तीवर तात्काळ गुन्हा दाखल करून त्याला अटक करावी आणि त्याच्यावर कठोर कायदेशीर कारवाई करावी. या प्रकरणाबाबत गुन्हा दाखल करून कारवाई करण्याची मागणी निवेदनाद्वारे केली आहे.
