मुंबई : डोंबाऱ्याच्या खेळावर आयुष्य जगत असतानाच झटपट पैशांसाठी चोरी केली आणि अटकही झाली. मात्र, ती वाट चुकीची होती म्हणून काही तरी वेगळं करण्यासाठी धडपड सुरू झाली. शिक्षण कमी, त्यात स्वतःची वेगळी ओळख करायची म्हणून परदेशातील गोल्ड मॅन मनाला भावाला. त्यानुसार, जगण्यासाठी पुतळा बनला.
मूळचा छतीसागडचा रहिवासी असलेल्या राहुल नट याने आई – वडिलांसह २००४ मध्ये मुंबई गाठली. राहुल सांगतो की, पोटाची भूक तुम्हाला अनेक वाटा दाखवते. आपण कुठल्या मार्गाने जायचे, हे आपणच ठरवायला हवे. अशात माझी वाट भरकटली.
चोरी केली आणि अडकलो. अटक झाली शिक्षा भोगली. अजूनही कोर्टात प्रकरण सुरू आहे. मात्र, ही वाट चुकीची होती, याची जाणीव झाली. त्यानंतर, सोशल मीडियावर शोध सुरू असताना गोल्डमॅन आवडला. मीही कुटुंबीयांसोबत वेगवेगळे साहसी खेळ खेळलो. ॲक्टिंग केली. यातूनच मीही सोनेरी रंग चढवून एकच ठिकाणी थांबण्याचे ठरवले. सुरुवातीपासूनच लोकांचा चांगला प्रतिसाद पाहून आत्मविश्वास वाढला आणि समाधानही मिळाले. मेहनतीच्या पैशांची किंमत कळली, असे त्याने आपले अनुभव सांगितले.
अवघ्या २५ सेकंदांचा ब्रेक
राहुल हा २०२१ पासून शिवाजी पार्क येथे सकाळी ११:०० वाजल्यापासून रात्री ११:०० वाजेपर्यंत उभा राहतो. या बारा तासांमध्ये तो तासाभराने २५ सेकंदाचा ब्रेक घेतो.
ऊन, पावसाची तमा न बाळगता तो पुतळा बनून उभा राहतो. अनेक जण सेल्फी काढतात. काही जण कलेची दाद देत पैसे देतात. त्यातूनच माझ्यासह माझ्या कुटुंबाचा उदरनिर्वाह चालतो.
