माणदेश एक्सप्रेस न्युज
मुंबई : मुंबईतील २६/११ च्या दहशतवादी हल्ल्याचा मुख्य सूत्रधार तहव्वूर राणा याला पटियाला हाऊस कोर्टाने १८ दिवसांची कोठडी सुनावली. एनआयएने २० दिवसांची कोठडी मागितली होती. राणा १८ दिवसांसाठी एनआयए कोठडीत राहील. यादरम्यान, मुंबईतील २६/११ च्या हल्ल्यांमागील संपूर्ण कट रचण्यासाठी एजन्सी त्याची सविस्तर चौकशी करेल. या हल्ल्यात १६६ लोकांचा मृत्यू झाला होता आणि २३८ हून अधिक लोक जखमी झाले होते.
एनआयएने २६/११ च्या मुंबई हल्ल्यातील आरोपी तहव्वूर राणा याने पाठवलेल्या ईमेलसह अनेक भक्कम पुरावे सादर केले होते, जे त्याच्या पोलिस कोठडीसाठी पुरसे ठरतात. या भयानक कटाचा उलगडा करण्यासाठी कोठडीत चौकशी आवश्यक असल्याचे एजन्सीने न्यायालयाला सांगितले. या प्राणघातक दहशतवादी हल्ल्यांमध्ये राणाच्या भूमिकेचीही चौकशी तपासकर्ते करतील. एनआयएने राणाला पटियाला हाऊस कोर्टातून त्यांच्या मुख्यालयात आणले आहे.
२६/११ च्या मुंबई हल्ल्यात १७४ लोक मृत्युमुखी पडले आणि ३०० हून अधिक जण जखमी झाले. हा हल्ला पाकिस्तानस्थित दहशतवादी संघटना लष्कर-ए-तैयबाने केला होता. या हल्ल्याचा कट रचण्यात राणाने महत्त्वाची भूमिका बजावल्याचा आरोप आहे. २०११ मध्ये त्याला भारतीय न्यायालयाने दोषी ठरवले होते, पण त्यावेळी तो अमेरिकेत होता. २००९ मध्ये त्याला अमेरिकेत अटक करण्यात आली होती आणि तेव्हापासून त्याने प्रत्यार्पणाविरुद्ध कायदेशीर मार्ग शोधण्याचा प्रयत्न केला.
तहव्वूर हुसेन राणा हा एक पाकिस्तान-कॅनडाचा नागरिक आहे जो पूर्वी पाकिस्तानी सैन्यात डॉक्टर म्हणून काम करत होता. १९९० च्या दशकात तो कॅनडाला गेला आणि २००१ मध्ये त्यांनी कॅनडाचे नागरिकत्व मिळवले. नंतर तो शिकागोमध्ये स्थायिक झाला, जिथे त्याने इमिग्रेशन कन्सल्टन्सीसह अनेक व्यवसाय सुरू केले. राणावर लष्कर-ए-तोयबाशी संबंध असल्याचा आणि दहशतवादी कारवायांमध्ये सहभागी असल्याचा आरोप आहे.
