मुंबई | प्रतिनिधी
“मी मराठी शिकणार नाहीच” अशी वादग्रस्त भूमिका घेतलेल्या व्यावसायिक सुशील केडिया यांनी अखेर माघार घेतली असून, सार्वजनिकरीत्या माफी मागितली आहे. मराठी भाषेबाबत केलेल्या वक्तव्यामुळे सामाजिक माध्यमांवर संतापाची लाट उसळली होती, तर मनसेच्या नेत्यांनी आक्रमक भूमिका घेत जोरदार टीकास्त्र सोडलं होतं.
विवादग्रस्त पोस्टमुळे तुफान प्रतिक्रिया
सुशील केडिया यांनी ‘एक्स’ (पूर्वीचं ट्विटर) या प्लॅटफॉर्मवर एक पोस्ट शेअर करत,
“मी गेली ३० वर्षं मुंबईत राहतो, पण अजून मराठी शिकलेलो नाही. आणि आता मी शिकणारही नाही. जोपर्यंत राज ठाकरेसारखे लोक भाषेच्या नावावर मराठी माणसाचे कैवारी म्हणून वावरतात, तोपर्यंत हा माझा ठाम निर्णय राहील,”
असं जाहीरपणे म्हटलं होतं.
त्यांच्या या वक्तव्यानंतर अनेक मराठीप्रेमी, सामान्य नागरिक तसेच मनसेचे नेते आक्रमक झाले. सोशल मीडियावर संतप्त प्रतिक्रिया उमटू लागल्या.
मनसेच्या आक्रमकतेनंतर माघार
या वादानंतर मनसेने जोरदार हल्ला चढवत केडियांच्या वक्तव्याचा निषेध केला. काही ठिकाणी मनसेच्या कार्यकर्त्यांनी निषेध सभा आणि पोस्टरबाजी करत विरोध नोंदवला. वाढत्या दबावानंतर सुशील केडिया यांनी अखेर माफी मागणारी पोस्ट शेअर केली.
त्यात त्यांनी म्हटलं की,
“माझ्या शब्दांमुळे जर कुणाच्या भावना दुखावल्या असतील, तर मी दिलगिरी व्यक्त करतो. माझा हेतू कोणाचाही अपमान करण्याचा नव्हता.”
भाषा हा भावनांचा विषय – प्रतिक्रिया उमगली
मराठी भाषेचा अपमान सहन न करणाऱ्या जनतेच्या आणि मनसेच्या तीव्र प्रतिक्रियेमुळे सुशील केडिया यांना अखेर आपल्या भूमिकेचा फेरविचार करावा लागला. भाषा ही फक्त संवादाचे माध्यम नसून, ती अस्मितेची ओळख असल्याची जाणीव या प्रकरणातून पुन्हा अधोरेखित झाली.
