‘पाणी’ या चित्रपटाच्या यशानंतर आदिनाथ कोठारे एका नव्या चित्रपटातून प्रेक्षकांच्या भेटीला येत आहे. ‘पाणी’ चित्रपटाची कथा आणि यातील गाणी थेट सामान्य माणसांच्या काळजाला भिडली. खेड्यापाड्यासह शहरांमध्येही अनेक ठिकाणी पाण्याच्या समस्या आहेत. अशा विषयावर चित्रपट बनवल्यानंतर आता आदिनाथ कोठारेकडून प्रेक्षकांच्या अपेक्षा फार वाढल्या आहेत. अशात नुकतीच त्याने त्याच्या आगामी चित्रपटाची घोषणा केली आहे.
आदिनाथने त्याच्या इन्स्टाग्राम अकाउंटवर काही फोटो पोस्ट केले आहेत. यातील एका फोटोत सनेमा क्लॅपरबोर्डवर ‘बेनं’ असं नाव लिहिण्यात आलं आहे, तर दुसऱ्या एका व्हिडीओमध्ये पहाटेच्यावेळी एक जहाज खोल समुद्रातून वाट काढत आहे; पुढे रात्रीच्या अंधारात वळणांच्या वाटेवरून एक चारचाकी जात आहे. तसेच पुढील दोन फोटोंमध्ये सूर्योदय आणि सूर्यास्त पाहायला मिळत आहे. आदिनाथने हे फोटो पोस्ट करत याला सुंदर कॅप्शनही दिलं आहे. “बेनं… एक नवं स्वप्न! एक नवा प्रवास सुरू…”, असं आदिनाथने यावर लिहिलं आहे.
आदिनाथ कोठारेने या चित्रपटाची घोषणा केल्यापासून चाहत्यांना या चित्रपटाच्या आणखी अपडेट्स जाणून घेण्यासाठी उत्सुकता लागली आहे. चित्रपटात आणखी कोणकोणते कलाकार झळकणार? चित्रपटाची कथा आणि गाणी कशी असणार? हे जाणून घेण्यासाठी चाहते उत्सुक आहेत. मात्र, अद्याप ‘बेनं’ या चित्रपटाबद्दल अधिक माहिती देण्यात आलेली नाही. सिनेविश्वातील अनेक कलाकारांसह चाहत्यांनी आदिनाथच्या या पोस्टवर कमेंट करत त्याचे अभिनंदन केले आहे, तर एका चाहत्याने “पाणी चित्रपट बघितल्यानंतर आता आम्ही आतुरतेने वाट बघतोय… लवकर या राव…”, अशी कमेंट केली आहे.
