💧🚩 आनंदराव बापू पाटील यांचा डॉ. भारत पाटणकर यांच्यावर आरोपांचा वर्षाव – ‘तुमच्या फसवणुकीमुळे चळवळी फुटल्या’

आटपाडी (प्रतिनिधी) : पाणी चळवळीच्या पार्श्वभूमीवर डॉ. भारत पाटणकर यांनी केलेल्या वक्तव्याला आटपाडीचे नेते आनंदराव बापू पाटील यांनी जोरदार प्रत्युत्तर दिले आहे. “जर मी  जागाच दिली  नसती, तर तुम्ही आटपाडी तालुक्याला ओळखलेच नसते,” असा  टोला देत त्यांनी भारत पाटणकर यांच्यावर अनेक गंभीर आरोप केले आहेत.

यावेळी पुढे बोलताना आनंदरावबापू पाटील म्हणाले, “मी जलसंपदा खात्यात नोकरी करत होतो. परंतु 1993 साली पाणी चळवळीसाठी राजीनामा दिला. त्यानंतर मी डॉक्टर नागनाथ अण्णा नायकवडी यांच्यासोबत क्रांतीची वाट चालत आहे. 26 जूनच्या पाणी परिषदेची तयारी ही माझ्या डाळिंब उत्पादक  संघातून  होत होती. नागनाथ अण्णा जर आटपाडीला आले नसते, तर इथे पाण्याचा मुद्दाच निर्माण झाला नसता. त्यांच्या पाठिशी उभं राहण्याऐवजी, तुम्ही त्यांनाच फसवलं आहे.”

तसेच 26 जून पाणी परिषदेचा सर्व खर्च हा नायकवडी अण्णांनीच केला असून, त्या श्रेयावर डॉ. पाटणकर डल्ला मारण्याचा प्रयत्न करत आहेत. तसेच, “सोपेकॉम” या संस्थेच्या माध्यमातून चळवळीत फूट पाडण्याचं काम भारत पाटणकर यांनी केलं असल्याचं त्यांनी सांगितलं.

सोपेकॉम फंडावर प्रश्नचिन्ह

“तुम्ही सोपेकॉम संस्थेला तालुक्यात आणलं, आणि त्यानंतर चळवळीचे तुकडे झाले. शेतकऱ्यांत फूट पाडली गेली. ही संस्था कुणाच्या आर्थिक पाठबळावर चालते? कोणत्या विदेशी किंवा खासगी निधीचा वापर केला जातो?”

त्यांचा थेट आरोप होता की, “सोपेकॉमच्या फंडावर कोणी फाईव्ह स्टार हॉटेलमध्ये राहत होतं, याचा खुलासा जनतेसमोर केला पाहिजे.”

ते पुढे म्हणाले की, “पाणी वापर संस्थांची संख्या 16 असताना, फक्त 12 संस्थांच्या सह्या घेऊन निर्णय घेतले गेले, हे स्पष्टपणे नियमबाह्य आहे.” त्यामुळे सोपेकॉमने तालुक्याच्या पाणी चळवळीत हस्तक्षेप करू नये, अशी मागणी करत, या संस्थेच्या आर्थिक व्यवहारांची सखोल चौकशी व्हावी, अशी जोरदार मागणी त्यांनी केली.

पार्श्वभूमी : पाणी चळवळीचा संघर्ष की नेतृत्वाचा वाद?

आटपाडी तालुक्यातील पाणी चळवळ ही गेली तीन दशके सुरू आहे. या चळवळीत अनेक कार्यकर्त्यांनी प्रामाणिक योगदान दिलं आहे. मात्र गेल्या काही काळात या चळवळीत नेतृत्वाच्या नावावर खालच्या पातळीवरचे आरोप, फसवणूक, आर्थिक पारदर्शकतेचा अभाव यामुळे जनतेत संभ्रम निर्माण झाला आहे.

वाचा: भारत पाटणकर यांच्या पत्रातील आरोप नेमके काय होते?