मुंबई | प्रतिनिधी
राज ठाकरे आणि उद्धव ठाकरे यांची २० वर्षांनंतर एकत्रित व्यासपीठावर उभं राहणं आणि ‘मराठी भाषे’साठी एकत्र येण्याचे स्पष्ट संकेत देणं, यामुळे महाराष्ट्राच्या राजकारणात मोठी खळबळ उडाली आहे. याच पार्श्वभूमीवर मुख्यमंत्री एकनाथ शिंदे गटातील मंत्री संजय शिरसाट यांनी यावर भाष्य करत महाविकास आघाडी तुटेल असं थेट भाकीत केलं आहे.
राज-उद्धव एकत्र येणार?
वरळीच्या मेळाव्यात राज आणि उद्धव यांनी मराठीसाठी एकत्र येण्याचे संकेत दिले. परंतु याचा राजकीय अर्थ लावण्याचा प्रयत्न सुरू असतानाच, शिंदे गटाने या युतीच्या शक्यतेकडे संशयाने पाहिलं आहे.
संजय शिरसाट म्हणाले,
“उद्धव ठाकरे यांनी एकत्र राहण्याचे वक्तव्य केले, पण राज ठाकरे यांनी त्याला स्पष्ट दुजोरा दिला का? हा मेळावा केवळ मराठी भाषेसाठी होता, युतीसाठी नव्हता.”
“आम्हाला फटका नाही, त्यांनाच होईल!”
शिरसाट यांनी स्पष्ट केलं की,
“राज-उद्धव एकत्र आल्याने आम्हाला काही फटका बसणार नाही. पण यामुळे महाविकास आघाडीमध्ये विसंवाद निर्माण होणार. काँग्रेस या मेळाव्यात सहभागी नव्हती, राष्ट्रवादीचे फक्त दोन नेते आले होते. याचा अर्थच महाविकास आघाडी एकत्र राहणार नाही.”
ते पुढे म्हणाले,
“जर युती झाली, तर ती दोघांसाठी पक्षांतर्गत अडचणी घेऊन येईल. कारण दोघांच्या स्वभावात फरक आहे. पहिली पायरी टाकली असली, तरी मंदिर दिसायला अजून बराच वेळ आहे.”
“भाषणात ‘नो पॉलिटिक्स’, पण परिणाम मोठा”
राज ठाकरे यांच्या भाषणाबद्दल शिरसाट म्हणाले की,
“राज यांनी संयमी, मुद्देसूद भाषण केलं. त्यांनी ‘नो पॉलिटिक्स’ असं म्हटलं असलं तरी त्यांचं भाषण लोकांना भावलं. उलट उद्धव ठाकरे यांच्या भाषणात नेहमीप्रमाणे टोमणे आणि टीकाच होती.”
“राजकीय हिशोब स्पष्ट!”
राजकारणात कोण नवरा आणि कोण नवरी हे अजून ठरलेलं नाही, असा टोलाही शिरसाटांनी लगावला.
“राज ठाकरे यांच्या पक्षातून लोक कमी गेले, पण उद्धव ठाकरेंच्या गटात मोठी पडझड झाली. त्यामुळे त्यांनाच चिंता आहे.”
