सिडनी कसोटीत जसप्रीत बुमराह सामना सुरू असतानाच अचानक मैदानाबाहेर गेला आणि त्यानंतर ट्रेनिंग किटमध्ये स्टेडियम सोडताना दिसला. त्यावेळी बुमराहला मैदानावर काहीतरी त्रास होत असल्याची, शक्यता वर्तवली जात होती. बुमराह भारताचा सर्वात महत्त्वाचा खेळाडू आणि गोलंदाज या मालिकेत राहिला आहे, ज्याने सर्वाधिक ३२ विकेट घेतले आहेत. सिडनी कसोटीत लंच ब्रेक नंतर बुमराह सराव किट घालून गेल्याचे पाहायला मिळाले. यानंतर भारताच्या फलंदाजीदरम्यान बुमराह पुन्हा स्टेडियममध्ये आला.
ऑस्ट्रेलियाविरुद्धच्या पाचव्या कसोटी सामन्याच्या दुसऱ्या दिवसाचा खेळ संपल्यानंतर प्रसिध कृष्णा टीम इंडियाच्या वतीने पत्रकार परिषदेसाठी आला होता. तेव्हा कृष्णाला बुमराहबद्दल प्रश्न विचारण्यात आला. जसप्रीत बुमराहच्या दुखापतीबाबत बोलताना प्रसिध कृष्णा म्हणाला, “जसप्रीत बुमराहच्या पाठीला दुखापत आहे. तो स्कॅनसाठी गेला होता. वैद्यकीय पथक त्याच्यावर लक्ष ठेवून आहे आणि स्कॅनचा निकाल आल्यावर पुढील गोष्टी आम्हाला कळतील.”
जसप्रीत बुमराहचा फलंदाजासाठी पुढचा क्रमांक आहे. यापेक्षा जास्त या सामन्यात भारतीय संघाला जसप्रीत बुमराहची संघाचा महत्त्वाचा गोलंदाज म्हणून सर्वाधिक गरज आहे. भारतीय संघ जर मोठी धावसंख्या उभारू शकला नाही तर ऑस्ट्रेलियाला लवकर सर्वबाद करत संघाला विजय मिळवून देण्यात बुमराहचं मोलाचं योगदान असेल.
