🔹 धनंजय मुंडेंना डावलून बाबरी मुंडेंचा राष्ट्रवादीत प्रवेश; बीडच्या राजकारणात खळबळ

माणदेश एक्सप्रेस न्यूज | बीड

बीड जिल्ह्यातील वडवणी शहरातून एक मोठी राजकीय उलथापालथ समोर आली आहे. बाबरी मुंडे आणि राजाभाऊ मुंडे हे आज राष्ट्रवादी काँग्रेस (अजित पवार गटात) प्रवेश करणार आहेत. मात्र या प्रवेश सोहळ्यात माजी मंत्री धनंजय मुंडे यांना डावलण्यात आल्याची जोरदार चर्चा जिल्हाभर रंगली आहे.

आज सायंकाळी ५.३० वाजता वडवणीत हा पक्षप्रवेश सोहळा पार पडणार असून, उपमुख्यमंत्री अजित पवार यांच्यासह आमदार प्रकाश सोळंके यांची प्रमुख उपस्थिती राहणार आहे. विशेष म्हणजे, या कार्यक्रमाच्या निमंत्रण पत्रिका आणि बॅनरवर धनंजय मुंडे यांचे नाव किंवा फोटो कुठेच झळकलेले नाहीत, ज्यामुळे राजकीय वर्तुळात एकच खळबळ उडाली आहे.

बाबरी मुंडे हे मंत्री पंकजा मुंडे यांचे जवळचे सहकारी म्हणून ओळखले जातात. त्यांनी आज पत्रकारांशी बोलताना स्पष्ट केलं की, “आम्ही प्रकाश सोळंके यांच्या नेतृत्वात पक्षात प्रवेश करत आहोत. धनंजय मुंडेंना आमंत्रण दिलं नाही. आले तरी त्यांचा प्रोटोकॉलप्रमाणे सन्मान केला जाईल. पण त्यांच्यासोबत आमचं कोणतंही बोलणं झालेलं नाही.”

दरम्यान, अजित पवार हे कालपासून बीड दौऱ्यावर असून, आज ते वडवणीत विकासकामांचे भूमिपूजन आणि विविध सभा-मेळाव्यांत सहभागी होत आहेत. याच पार्श्वभूमीवर बाबरी आणि राजाभाऊ मुंडे यांचा पक्षप्रवेश हा धनंजय मुंडेंच्या भूमिकेवर प्रश्नचिन्ह निर्माण करणारा ठरत आहे.

राजकीय तज्ञांच्या मते, “बीड जिल्ह्यात मुंडे कुटुंबाच्या विरोधातच घरातून नवा गट तयार होतोय की काय?” असा प्रश्न आता उपस्थित केला जात आहे.