माणदेश एक्सप्रेस न्यूज नेटवर्क । ६ ऑगस्ट २०२५
क्रिकेटच्या पंढरी मानल्या जाणाऱ्या लॉर्ड्स मैदानावर एका क्रिकेट सामन्यादरम्यान घडलेला एक अनपेक्षित आणि मजेशीर प्रसंग सध्या सोशल मीडियावर चांगलाच व्हायरल होत आहे. यामध्ये मुख्य भूमिकेत आहे तो आपल्या बालपणातील कथांमधून परिचित, चलाख आणि धूर्त म्हणून ओळखला जाणारा – कोल्होबा!
५ ऑगस्ट रोजी द हंड्रेड २०२५ या प्रसिद्ध टी-२० फॉरमॅटच्या पाचव्या सत्राचा उद्घाटनाचा सामना लंडन स्पिरिट विरुद्ध ओव्हल इनविंसिबल्स या दोन संघांमध्ये खेळवला जात होता. सामना रंगात आला असतानाच अचानक एक कोल्हा मैदानात शिरला, आणि मैदानात प्रेक्षकांसह खेळाडूंनाही क्षणभर गोंधळात टाकत थेट सुसाट धावत गेला.
🦊 कोल्ह्याची धमाल एंट्री
हा धूर्त पाहुणा जवळपास एक मिनिटभर मैदानात वेगाने धावताना दिसला. खेळात अचानक झालेल्या या हस्तक्षेपामुळे सामना काही काळ थांबवावा लागला. यावेळी प्रेक्षकांनी कोल्ह्याच्या या धडाडीच्या एंट्रीचा उत्स्फूर्तपणे आनंद घेतला. मैदानावरील अनेक खेळाडू आणि स्टाफही हसत-हसत हा प्रसंग पाहत होते.
आश्चर्याची गोष्ट म्हणजे, कोणीही पकडण्याच्या आधीच कोल्हा स्वतःहून मैदानाबाहेर गेला. त्याची ही भन्नाट एन्ट्री आणि एक्झिट Sky Sports ने आपल्या अधिकृत सोशल मीडियावर व्हिडिओच्या माध्यमातून शेअर केली आहे, आणि काही तासांतच हा व्हिडिओ व्हायरल झाला.
🎯 सामना कोण जिंकला?
या मजेशीर वळणानंतर सामना पुन्हा सुरु झाला. लंडन स्पिरिट संघाने ९४ चेंडूंमध्ये ८० धावा केल्या. त्यांच्या फलंदाजांना राशीद खान आणि सॅम कुरेन यांच्या गोलंदाजीपुढे अपयश आले. या दोघांनी प्रत्येकी ३-३ बळी घेतले.
त्यानंतर मैदानात उतरत ओव्हल इनविंसिबल्स संघाने ६९ चेंडूंमध्ये ६ विकेट राखून सामना जिंकला. सामना जिंकून देणाऱ्या अप्रतिम गोलंदाजीसाठी राशीद खानला सामनावीर पुरस्कार देण्यात आला.
🧠 क्रिकेट आणि कोल्होबा: एक अनोखा संगम!
कोल्हा हा सामान्यतः जंगल परिसरात आढळणारा प्राणी. पण अशा मोठ्या आंतरराष्ट्रीय स्पर्धेच्या मैदानात त्याचा प्रवेश ही गोष्ट चक्क कथा-कवितांपलिकडची वाटावी अशीच होती. अनेकांनी यावर विनोदी मीम्स आणि कॅप्शनसह पोस्ट शेअर करत सोशल मीडियावर भन्नाट प्रतिक्रिया दिल्या आहेत.
A fox runs loose at The Hundred! 🦊 pic.twitter.com/Hof6I0X4jf
— Sky Sports (@SkySports) August 5, 2025
