माणदेश एक्सप्रेस न्यूज | सांगली :
व्हाईट हाऊस हॉटेलच्या बारमध्ये झाला तो साधासुधा वाद नव्हता. दारूच्या नशेत चाकू बाहेर आला, आणि पलक झपकण्याच्या आत रक्ताचा सडा उडाला. विश्रामबाग येथील शंभरफुटी रस्त्यावरील या गजबजलेल्या हॉटेलमध्ये बुधवारी सायंकाळी सातच्या सुमारास मित्रानेच मित्राचा गळा चिरून निर्घृण खून केला. या घटनेने सांगलीत एकच खळबळ उडाली.
मृत तरुण निखील रवींद्र साबळे (वय २५, रा. पालवी हॉटेलजवळ, कुपवाड) असून, आरोपी मित्र प्रसाद दत्तात्रय सुतार (रा. कुपवाड) हा घटनेनंतर दुचाकीवरून थेट कोल्हापूरच्या दिशेने फरार झाला. रात्री उशिरापर्यंत गुन्हे अन्वेषण पथक त्याच्या शोधात होते.
उपलब्ध माहितीनुसार निखील व आरोपी प्रसाद हे दोघेही एकमेकांचे परिचित. दोघेही त्या भागातील व्यवसायिक पार्श्वभूमीचे. प्रसाद सुतार याचे व्हाईट हाऊससमोरच ओंकार सर्व्हिसिंग सेंटर असून, निखील पूर्वी आईस्क्रीम पार्लर चालवत होता; सध्या सर्व्हिस सेंटरमध्ये काम करीत होता.
सायंकाळी सातच्या सुमारास दोघे व्हाईट हाऊसच्या पहिल्या मजल्यावरील बारमध्ये दारू पिण्यास आले. बार नुकताच उघडला असल्याने आत इतर कोणी ग्राहक नव्हते. दोघे एका कोपऱ्यातील टेबलावर बसले; सुरुवातीला हसतखेळत चर्चा, पण काही मिनिटांत वादाचे स्वरूप घेतले.
वाद चिघळताच प्रसादने कमरेला लावलेला दातऱ्यासारखा धारदार चाकू काढला आणि निखीलच्या गळ्यावर एकाच वेळी भीषण वार केला. वार इतका खोलवर की जागेवरच रक्तस्त्रावाने निखीलचा मृत्यू झाला. आरोपी चाकू टेबलावर टाकून बारच्या बाहेर धावत सुटला आणि दुचाकीवरून कोल्हापूरच्या दिशेने पसार झाला.
घटनास्थळी वेटर व स्टाफची धावपळ सुरू झाली. खबर मिळताच
पोलिस निरीक्षक सुधीर भालेराव (विश्रामबाग पोलीस ठाणे)
स्थानिक गुन्हे अन्वेषण शाखेचे पोनि. सतीश शिंदे
सहायक निरीक्षक पंकज पवार
उपअधीक्षक प्रणिल गिल्डा
हे पथक तातडीने दाखल झाले. नंतर जिल्हा पोलिस अधीक्षक संदीप घुगे यांनीही घटनास्थळी भेट देऊन तपासाबाबत सूचना दिल्या.
मृताची ओळख सुरुवातीला पटली नाही. मात्र आरोपीचा सर्व्हिसिंग सेंटर हॉटेलसमोर असल्याने परिसरात माहिती मिळाली आणि मृत तरुण निखील साबळे असल्याचे स्पष्ट झाले.
पोलिसांकडून प्राथमिक तपासात आर्थिक व्यवहारांचा वाद असावा असा अंदाज वर्तवण्यात आला आहे. मात्र, “आरोपीच्या ताब्यात आल्यानंतरच नेमके कारण स्पष्ट होईल,” असे गुन्हे अन्वेषण विभागाने सांगितले.
उपनिरीक्षक कुमार पाटील आणि त्यांचे पथक रात्री उशिरापर्यंत आरोपीच्या मागावर होते.
या हॉटेलची बदनामी नवीन नाही. ऑगस्ट महिन्यातच अनैतिक व्यापार प्रतिबंधक पथकाने येथे वेश्याव्यवसाय प्रकरणात छापा टाकला होता. लॉज चालक व अन्य तीन जणांवर त्यावेळी गुन्हा नोंदविण्यात आला होता. त्याच जागी पुन्हा गुन्हेगारी घटना घडल्याने चर्चा रंगली आहे.
यापूर्वीही २०२३ मध्ये आरोपी प्रसाद सुतारने याच हॉटेलमध्ये एका व्यक्तीवर हल्ला केला होता असेही समोर आले आहे. त्यावर विश्रामबाग पोलीस ठाण्यात गुन्हा नोंद आहे.
निखील विवाहित असून त्याला दोन लहान मुले आहेत. सकाळी घरातून कामासाठी निघालेला तरुण संध्याकाळी मृतदेह म्हणून परत येणार हे घरच्यांना कल्पनाही नव्हती. कुटुंबीयांवर दुःखाचा डोंगर कोसळला असून परिसरात हळहळ व्यक्त होत आहे.
पोलिसांनी परिसरातील सीसीटीव्ही फुटेज ताब्यात घेतले असून कोल्हापूर मार्गावर नाकाबंदी केली आहे. आरोपी लवकरच पोलिसांच्या जाळ्यात सापडेल, असा विश्वास पोलीस दाबून व्यक्त करत आहेत.
