🚨 व्हॉट्सएप स्टेटसवरून ठिणगी; साखरपुडा-हळदी सोहळा रक्तरंजित, धुळ्यात तिघांचा मृत्यू

February 20, 2026

पिंपळनेर (ता. साक्री) : आनंदाच्या वातावरणात सुरू असलेला विवाह सोहळा क्षणात शोकाकुल बनला. धुळे जिल्ह्यातील पिंपळनेर येथील नीळकंठ नगर परिसरात साखरपुडा व हळदी कार्यक्रमादरम्यान दोन गटांमध्ये झालेल्या भीषण हाणामारीत तिघांचा मृत्यू झाला, तर आठ जण गंभीर जखमी झाले. घटनेनंतर परिसरात खळबळ उडाली असून पोलीस तपास वेगाने सुरू आहे.

प्राप्त प्राथमिक माहितीनुसार, गोसावी समाजातील एका विवाह सोहळ्यानिमित्त गुरुवारी हळदीचा कार्यक्रम रंगात आला होता. वराकडील मंडळी, नातेवाईक आणि पाहुणे हास्यविनोदात रमलेले असतानाच क्षुल्लक कारणावरून दोन गटांत बाचाबाची झाली. हा वाद चिघळत जाऊन त्याचे रूपांतर हाणामारीत झाले. संतापलेल्या काही जणांनी धारदार शस्त्रांनी एकमेकांवर वार केल्याने कार्यक्रमस्थळी एकच गोंधळ उडाला.

या प्राणघातक हल्ल्यात दोघांचा घटनास्थळीच मृत्यू झाला. तर एका गंभीर जखमी व्यक्तीला उपचारासाठी धुळ्यात हलवताना वाटेतच त्याचा मृत्यू झाला. अवघ्या काही तासांवर लग्न असताना मंगल कार्यालयात आनंदाऐवजी आक्रोश पसरला. जखमींना तातडीने रुग्णालयात दाखल करण्यात आले असून काहींची प्रकृती चिंताजनक असल्याचे समजते.

तपासादरम्यान समोर आलेल्या माहितीनुसार, जुन्या वादाच्या पार्श्वभूमीवर काही नातेवाईकांनी व्हॉट्सअॅपवर एकमेकांना डिवचणारे ‘स्टेटस’ ठेवले होते. या डिजिटल वादाचा राग प्रत्यक्ष भेटीत अनावर झाला आणि परिस्थिती हिंसक बनली. साक्री व सोनगड (गुजरात) येथून आलेल्या नातेवाईकांमध्ये तणाव वाढल्याचेही सांगितले जाते.

आरोपींची नावे

या प्रकरणी पोलिसांनी यशवंत गोपाल गोसावी, अनिल गिरी हटुगिरी गोसावी, सोनुगिरी गोसावी, विजुगिरी हटुगिरी गोसावी, कमलेश गिरी शंभु गिरी गोसावी आणि हर्षु शंभु गोसावी यांच्यावर हल्ल्याचे आरोप नोंदवले आहेत. पोलिसांनी काही संशयितांना ताब्यात घेतल्याची माहिती मिळत असून, जुन्या वादाचे नेमके स्वरूप व घटनेमागील कारणांचा तपास सुरू आहे.

घटनेची माहिती मिळताच पोलिसांनी घटनास्थळी धाव घेत परिस्थिती नियंत्रणात आणली. आनंदी सोहळ्याचे रूपांतर अशा दुर्दैवी घटनेत झाल्याने संपूर्ण जिल्ह्यात हळहळ व्यक्त होत आहे.