माणदेश एक्सप्रेस न्यूज :- पुणे पोलिसांनी खराडी भागात रेव्ह पार्टीत छापेमारी करत एकनाथ खडसे यांचे जावई प्रांजल खेवलकर याला अटक केली आहे. या पार्टीत केवळ पुरुष नव्हते तर अनेक महिला सहभागी होत्या, ज्यामुळे खळबळ उडाली आहे. सध्या या प्रकरणी सर्व आरोपी कोठडीत आहेत.
रूपाली चाकणकर यांनी पत्रकार परिषदेत प्रांजल खेवलकरच्या मोबाईलमधील मुलींच्या चॅटचे स्क्रीनशॉट आणि नग्न फोटो, तसेच त्याचा काही व्हिडीओ असल्याचा गंभीर आरोप केला आहे. त्यांनी सांगितले की, खेवलकर मुलींना नशा करण्यास भाग पाडत होता आणि त्यांच्यावर अत्याचार घडवले जात होते.
या गंभीर प्रकरणावर महिला आयोगानेही तपास सुरू केला असून पोलिसांकडून संपूर्ण अहवाल मागवण्यात आला आहे. रूपाली चाकणकर यांनी सांगितले की, या सर्व घटनांमुळे त्यांना रोहिणी खडसे यांच्याविषयी सहानुभूती वाटते. जर खडसे यांना पूर्ण माहिती असेल आणि तरीही त्यांनी यास समर्थन दिले तर ते गुन्हेगारांच्या सहकार्याचे द्योतक ठरेल, जे दुर्लक्षित करता येण्यासारखे नाही.
रोहिणी खडसे आणि रूपाली चाकणकर यांच्यातील वाद ऐतिहासिक असून दोघीही एकमेकांवर जोरदार टीका करताना दिसतात. प्रकरणासंदर्भात एकनाथ खडसे यांनी सुरुवातीला प्रांजल खेवलकरला फसवण्यात आले असल्याचे सांगितले होते. या सगळ्यांमध्ये सुप्रिया सुळे यांनीही रोहिणी खडसे यांच्यासाठी पाठिंबा दर्शवला आहे.
