अभिनेता विकी कौशलची मुख्य भूमिका असलेल्या ‘छावा’ या चित्रपटाविषयी प्रेक्षकांमध्ये प्रचंड उत्सुकता आहे. यामध्ये तो छत्रपती संभाजी महाराजांची भूमिका साकारत आहे. चित्रपटातील त्याचे विविध लूक नुकतेच सोशल मीडियावर प्रदर्शित करण्यात आले.
‘अग्नि भी वो, पानी भी वो, तुफान भी वो, शेर शिवा छावा है वो…’ असं म्हणत ‘मॅडॉक फिम्स’ने ‘छावा’ या चित्रपटातील विकी कौशलचे विविध लूक प्रेक्षकांसमोर आणले आहेत. छत्रपती संभाजी महाराजांच्या राज्यभिषेक दिनाचं औचित्य साधून या चित्रपटाचं पोस्टर प्रदर्शित करण्यात आलं.या पोस्टरने चाहत्यांचं लक्ष वेधून घेतलं असून प्रेक्षक या चित्रपटाची आतुरतेने वाट पाहत आहेत.
छत्रपती संभाजी महाराजांच्या शौर्याचा धगधगता इतिहास या चित्रपटातून मांडण्यात येणार आहे. यामध्ये विकी कौशलसोबत रश्मिका मंदाना आणि अक्षय खन्ना यांच्याही महत्त्वपूर्ण भूमिका आहेत.
या आधीही छत्रपती संभाजी महाराजांच्या आयुष्यावर आधारित अनेक चित्रपटांची निर्मिती करण्यात आली होती, मात्र संपूर्ण भारतभर मोठ्या पातळीवर छत्रपती संभाजी महाराजांची कथा मांडण्यात दिग्दर्शक – निर्मात्यांना यश आलं नव्हतं.
‘छावा’ या चित्रपटाचं दिग्दर्शन लक्ष्मण उतेकर यांनी केलं असून निर्माते दिनेश विजन यांनी या चित्रपटाची निर्मिती केली आहे. ऑस्कर विजेते संगीतकार ए. आर. रेहमान यांनी या चित्रपटाला संगीत दिलं आहे. येत्या 14 फेब्रुवारी रोजी हा चित्रपट प्रेक्षकांच्या भेटीला येणार आहे.
