माणदेश एक्सप्रेस न्यूज | मुंबई :
दर आठवड्याला ओटीटी प्लॅटफॉर्मवर असंख्य नवे चित्रपट प्रेक्षकांसमोर येतात. काही चित्रपट सुरुवातीच्या काही दिवसांतच गाजून जातात, तर काहींना प्रेक्षकांकडून अपेक्षित प्रतिसाद मिळत नाही. पण यंदाच्या ऑगस्ट महिन्यात प्रदर्शित झालेल्या एका तमिळ चित्रपटाने ओटीटीवर अक्षरशः धुमाकूळ घातला आहे. तमिळ रोड म्युझिकल कॉमेडी ‘परंथु पो’ (Paranthu Po) या चित्रपटाने केवळ प्रेक्षकांची मने जिंकली नाहीत, तर IMDb वर तब्बल 7.9 अशी उच्च रेटिंग मिळवत इतर गाजलेल्या चित्रपटांनाही मागे टाकले आहे.
१ ऑगस्टला झाला ओटीटीवर रिलीज, प्रेक्षकांचा भरभरून प्रतिसाद
‘परंथु पो’ हा चित्रपट १ ऑगस्ट २०२५ रोजी जिओ हॉटस्टारवर प्रदर्शित झाला. रिलीज होताच सोशल मीडियावर या चित्रपटाच्या कथानकाची, संवादांची आणि कलाकारांच्या अभिनयाची जोरदार चर्चा सुरू झाली. ४ ऑगस्ट ते १० ऑगस्ट या आठवड्यात हा ओटीटीवरील सर्वाधिक पाहिलेला दक्षिण भारतीय चित्रपट ठरला असून तब्बल २२ लाख प्रेक्षकांनी हा चित्रपट पाहिला.
कथानक साधं, पण हृदयाला भिडणारं
चित्रपटाचं दिग्दर्शन, लेखन आणि सहनिर्मिती राम यांनी केली आहे. कथानक एका ८ वर्षांच्या हट्टी मुलाभोवती फिरतं. मिथुल रायन यांनी साकारलेली ही बालभूमिका प्रेक्षकांच्या मनात घर करून गेली आहे. त्याच्या पालकांच्या भूमिकेत शिवा (गोकुळ) आणि ग्रेस अँटनी (अंजली) यांनी ताकदीचा अभिनय केला आहे. याशिवाय विजय येसुदास आणि अजू वर्गीस यांनीही महत्त्वपूर्ण भूमिका साकारल्या आहेत.
थिएटरमध्ये अपयश, पण ओटीटीवर ‘ब्लॉकबस्टर’
‘परंथु पो’ने थिएटरमध्ये अपेक्षित यश मिळवू शकले नाही. मात्र ओटीटीवर प्रदर्शित होताच चित्रपटाने लोकप्रियतेचे विक्रम मोडले. कमी खर्चात तयार झालेल्या या चित्रपटाने प्रेक्षकांच्या मनावर जादू केली आहे. जिओ हॉटस्टारवर हिंदी भाषेतही उपलब्ध असलेल्या या चित्रपटाने तेलुगूच्या ‘थम्मुडू’, तमिळच्या ‘३बीएचके’, मल्याळमच्या ‘नादिकर’ यांसारख्या लोकप्रिय चित्रपटांना मागे टाकले आहे.
IMDb वर उच्च रेटिंगचा मान
ओटीटीवरच्या यशाबरोबरच IMDb वर ७.९ रेटिंग मिळवणं ही देखील या चित्रपटाची मोठी कामगिरी ठरली आहे. समीक्षकांनी चित्रपटाच्या कथानकातील साधेपणा, मानवी भावना आणि संगीताच्या उत्तम वापराचं विशेष कौतुक केलं आहे.
‘परंथु पो’चा हा ओटीटीवरील यशाचा प्रवास हे सिद्ध करतो की, थिएटरमधील अपयश म्हणजे अंतिम निकाल नाही, तर योग्य प्लॅटफॉर्म मिळाला तर कोणताही चित्रपट प्रेक्षकांच्या मनात घर करू शकतो.
