वराह जयंतीवरून ठाकरे गटाची आक्रमक भूमिका; भाजप-ठाकरे संघर्ष उग्र होणार का?

माणदेश एक्सप्रेस न्यूज | सोलापूर :
राज्यातील राजकीय वातावरण पुन्हा तापणार असल्याचे संकेत आज सोलापुरात दिसले. शिवसेना (ठाकरे गट) कार्यकर्त्यांनी भाजप नेते व मंत्री नितेश राणे यांच्या विरोधात थेट अनोख्या पद्धतीने आंदोलन छेडले. आंदोलनात डुकराच्या मुखावर नितेश राणे यांचा फोटो लावण्यात आला आणि त्याला घेरून घोषणाबाजी करत ठाकरे गटाने संताप व्यक्त केला. यामुळे परिसरात मोठी गर्दी झाली तर या आंदोलनाने नव्या वादाला तोंड फुटण्याची शक्यता निर्माण झाली आहे.

पार्श्वभूमी : वराह जयंतीवरून राणेंची मागणी

आज २५ ऑगस्ट, भाद्रपद शुद्ध द्वितीया. हिंदू धर्मातील दशावतारांपैकी तिसरा अवतार असलेल्या भगवान वराहाची जयंती. भाजपकडून हा दिवस राजकीय व धार्मिक पातळीवर मोठ्या प्रमाणावर साजरा करण्यात येतो आहे.
मंत्री नितेश राणे यांनी नुकतेच उपमुख्यमंत्री देवेंद्र फडणवीस यांना पत्र लिहून “राज्यात वराह जयंती सरकारी पातळीवर साजरी व्हावी” अशी मागणी केली होती. या पत्रात त्यांनी वराह अवताराच्या पूजनाचे महत्त्व मांडत “समाजात धर्म, सदाचार व पर्यावरण रक्षणाची जाणीव जागृत होते” असे स्पष्ट केले होते.

ठाकरे गटाचा प्रतिकार

याच पार्श्वभूमीवर ठाकरे गट आक्रमक झाला आहे. सोलापुरातील आंदोलनादरम्यान ठाकरे गटाच्या कार्यकर्त्यांनी डुकराला पकडून त्यावर नितेश राणेंचा चेहरा असलेला फोटो लावला. त्यानंतर या “वराह” भोवती फिरत भाजप व राणे यांच्याविरोधात घोषणाबाजी केली.
ठाकरे गटाच्या कार्यकर्त्यांचे म्हणणे आहे की –
“नितेश राणे सतत उद्धव ठाकरे व शिवसैनिकांचा अवमान करतात. धार्मिक भावना उचलून धरून ते समाजात द्वेष पसरवण्याचा प्रयत्न करतात. अशा व्यक्तींना आंदोलनातून चोख प्रत्युत्तर दिले पाहिजे.”

राजकीय प्रतिक्रिया पेटणार?

या आंदोलनामुळे राजकीय वातावरण अजूनच तापेल, अशी चिन्हे दिसत आहेत. भाजपकडून या कृतीचा निषेध होण्याची शक्यता असून, ठाकरे गटाच्या पद्धतीवरून नवा वाद निर्माण होईल.
विशेष म्हणजे, गेल्या काही महिन्यांपासून ठाकरे गट व शिंदे-भाजप युती यांच्यातील जुंपण अधिक तीव्र झाली आहे. त्यात अशा प्रकारच्या प्रतीकात्मक आंदोलनामुळे दोन्ही बाजूंचा संघर्ष आणखी उग्र होण्याचे संकेत आहेत.

पुढील पाऊल काय?

भाजपकडून या आंदोलनाला प्रत्युत्तर दिलं जाण्याची शक्यता आहे. वराह जयंतीसारख्या धार्मिक प्रसंगी अशा प्रकारचं आंदोलन योग्य आहे का, हा प्रश्न उपस्थित होतोय. तर ठाकरे गटाने मात्र आपली भूमिका ठाम ठेवली असून, “ज्यांनी शिवसेनेचा अवमान केला त्यांना प्रत्युत्तर मिळेलच,” असं स्पष्ट संदेश दिला आहे.