माणदेश एक्स्प्रेस न्यूज | वॉशिंग्टन :
अमेरिकेचे राष्ट्राध्यक्ष डोनाल्ड ट्रम्प यांनी भारतासह अनेक देशांवर 50 टक्के टॅरिफ लावण्याचा घेतलेला निर्णय आता अमेरिकेलाच अंगलट ठरताना दिसत आहे. भारत रशियाकडून मोठ्या प्रमाणावर तेल खरेदी करत असल्याचा ठपका ठेवत ट्रम्प प्रशासनाने हा निर्णय घेतला. मात्र, या टॅरिफ धोरणाचे परिणाम उलटे पडले असून, डॉलर सातत्याने घसरत आहे. अर्थतज्ज्ञांनी दिलेल्या अंदाजानुसार आगामी काही दिवसांतही डॉलरची घसरण सुरूच राहणार असून, याचा मोठा फटका अमेरिकेला बसणार आहे.
डॉलर ही जगातील सर्वात मजबूत चलन म्हणून ओळखली जाते. पण गेल्या 72 दिवसांपासून – तब्बल दहा आठवडे – डॉलर सातत्याने घसरत आहे. मंगळवारी डॉलर आपल्या प्रमुख प्रतिस्पर्धी करन्सीच्या तुलनेत जुलैनंतर प्रथमच निचांकी पातळीवर गेला.
मार्केट वॉचच्या डाटानुसार डॉलरचा इंडेक्स 96.93 वर पोहोचला.
फॅक्ससेटच्या आकडेवारीनुसार डॉलर युरो आणि येनच्या तुलनेत 0.5 टक्क्यांनी घसरला आहे.
पुढील काही आठवड्यांत डॉलर आणखी 0.25 टक्क्यांनी घसरण्याचा अंदाज वर्तवला जात आहे.
अर्थतज्ज्ञांचे म्हणणे आहे की, जर फेडरल रिझर्व्हने रेपो रेट 35 ते 50 बेसिस पॉइंटने कमी केला, तर डॉलरमध्ये आणखी घसरण होण्याची शक्यता नाकारता येत नाही.
ट्रम्प प्रशासनाने भारतावर 50 टक्के टॅरिफ लावला आणि त्याच धर्तीवर चीनसह अनेक देशांवरही टॅरिफचा बोजा टाकला. मात्र, या निर्णयाचा फटका परदेशांपेक्षा स्वतः अमेरिकेलाच बसत असल्याचे चित्र आहे.
अमेरिकन निर्यातीवर टॅरिफमुळे दबाव वाढला आहे.
जपानी येन आणि युरोपीय चलन डॉलरच्या तुलनेत मजबूत झाले आहेत.
अमेरिकन उद्योगपती व आयातदार यांच्यात अस्वस्थता पसरली आहे.
डॉलर घसरत असताना भारतीय रुपया मात्र सुधारतोय. गेल्या दोन दिवसांपासून रुपयाच्या घसरणीला ब्रेक लागला असून, डॉलरच्या तुलनेत रुपयाच्या मुल्यात वाढ दिसून येत आहे. सध्या रुपया प्रति डॉलर 87.50 च्या आसपास पोहोचला आहे.
यामुळे भारतीय आयातदारांना काहीसा दिलासा मिळाला आहे.
रुपयाच्या या मजबुतीला डॉलरमधील घसरण मोठ्या प्रमाणावर कारणीभूत असल्याचे तज्ज्ञ सांगत आहेत.
डॉलरच्या सातत्याने होत असलेल्या घसरणीमुळे अमेरिकन बाजारपेठेत प्रचंड अस्थिरता निर्माण झाली आहे. गुंतवणूकदारांचा विश्वास डळमळीत होत असून, ट्रम्प प्रशासनाविरोधात टीकेची लाट उसळली आहे.
अमेरिकेच्या आर्थिक धोरणांवर प्रश्नचिन्ह उपस्थित झाले आहेत.
निर्यातदार, उद्योगपती आणि बाजारपेठा यामध्ये प्रचंड अनिश्चितता आहे.
पुढील काही दिवस डॉलरमध्ये मोठी घसरण कायम राहिल्यास ट्रम्प सरकारसमोर गंभीर आव्हान उभे राहणार आहे.
थोडक्यात, ट्रम्प यांनी घेतलेला टॅरिफचा तुघलकी निर्णय भारत किंवा इतर देशांपेक्षा स्वतः अमेरिकेलाच महागात पडत आहे. डॉलरमधील घसरणीमुळे अमेरिकेतील अर्थव्यवस्थेला मोठा धक्का बसू शकतो, तर दुसरीकडे भारतीय रुपयामध्ये सुधारणा दिसत असल्याने भारतासाठी हा दिलासादायक क्षण ठरत आहे.
