माणदेश एक्सप्रेस न्युज | पिंपरी :
वाकड येथील एका मॉलमध्ये सुरक्षा रक्षक म्हणून कार्यरत असलेल्या २१ वर्षीय तरुणीवर तिच्याच वरिष्ठाने अतिप्रसंग करण्याचा प्रयत्न केल्याची धक्कादायक घटना उघडकीस आली आहे. या प्रकरणी वाकड पोलिसांनी संशयित मनोज कदम (वय ३५) याला अटक केली असून सध्या तो न्यायालयीन कोठडीत आहे.
१० सप्टेंबर रोजी ही घटना घडली. पीडित महिला रोजप्रमाणे कामावर आली होती. मॉलमध्ये एकूण १० पुरुष आणि ३ महिला सुरक्षा रक्षक कार्यरत असून मनोज कदम हा त्यांचा वरिष्ठ अधिकारी होता. कामाचे वाटप करताना त्याने पीडितेला टॉवर क्लबमध्ये पाठवले आणि स्वतःही तिच्यासोबत गेला.
तेथे आधीपासूनच उपस्थित असलेल्या इतर कर्मचाऱ्यांना त्याने बाहेर पाठवले. त्यानंतर बढती आणि पगारवाढीचे आमिष दाखवत पीडितेचा विश्वास संपादन करण्याचा प्रयत्न केला. मात्र महिलेने त्याला नकार दिल्यानंतर त्याने तिच्याशी असभ्य वर्तन करत जबरदस्ती करण्याचा प्रयत्न केला.
महिलेने तात्काळ आरडाओरडा करून विरोध केला आणि प्रतिकार करत त्याला मारहाणही केली. तरीदेखील “इथे कोणी येणार नाही” असे धमकीचे शब्द उच्चारत कदमने अतिप्रसंगाचा प्रयत्न सुरूच ठेवला. घटनेनंतर महिला खाली आली असता सुपरवायझरने तिची विचारपूस केली. त्यावेळी तिने घडलेला प्रकार सांगितला आणि नंतर पतीलाही बोलावून घेतले.
या घटनेची तक्रार पीडित महिलेने १२ सप्टेंबर रोजी वाकड पोलिस ठाण्यात दिली. पोलिसांनी तत्काळ मनोज कदमविरुद्ध गुन्हा दाखल करून त्याला अटक केली. तपासादरम्यान कदमला हृदयविकाराचा त्रास असल्याने त्याला थेरगाव येथील रुग्णालयात उपचारासाठी ठेवण्यात आले. सध्या तो न्यायालयीन कोठडीत असून उपचार पूर्ण झाल्यानंतर पोलिस कोठडीची मागणी करण्यात येणार आहे.
या गंभीर प्रकरणाच्या तपासासाठी पोलिस उपायुक्त विशाल गायकवाड, सहायक पोलिस आयुक्त सुनील कुराडे, तसेच वरिष्ठ पोलिस निरीक्षक शत्रुघ्न माळी यांनी मार्गदर्शन केले आहे. तपास पोलिस निरीक्षक नीता गायकवाड यांच्या पथकाकडून सुरू आहे.
या घटनेमुळे स्थानिकांमध्ये तीव्र संताप व्यक्त होत आहे. महिला सुरक्षा रक्षकांवरच वरिष्ठांनी दबाव टाकून अशा प्रकारे वर्तन करणे हे संतापजनक असल्याची प्रतिक्रिया विविध स्तरांतून दिली जात आहे. महिलांच्या सुरक्षेचा प्रश्न पुन्हा ऐरणीवर आला असून पोलिसांकडून कठोर कारवाईची मागणी होत आहे.
