माणदेश एक्सप्रेस न्यूज|मुंबई – देशांतर्गत शेअर बाजारात आज जुलै महिन्याच्या डेरिव्हेटिव्ह सीरिजची सुरुवात सकारात्मक वातावरणात झाली. सलग चौथ्या दिवशी बाजारात तेजी पाहायला मिळाली.
आज सेन्सेक्स १९ अंकांच्या वाढीसह ८३,७७४ वर उघडला आणि कामकाजादरम्यान १६० अंकांहून अधिक वाढत ग्रीन झोनमध्ये राहिला. निफ्टी २५,५७६ वर उघडून त्यातही ६० अंकांची वाढ झाली. बँक निफ्टी ५७,२३४ वर उघडून २८ अंकांनी वधारला.
डॉलरच्या तुलनेत रुपयातही मजबुती दिसून आली. रुपया २० पैशांनी वधारत ८५.५१ रुपये प्रति डॉलरवर खुला झाला. जागतिक बाजारातील सकारात्मक संकेतांमुळे गुंतवणूकदारांचा बाजारावर विश्वास वाढलेला दिसला.
टॉप गेनर्स:
आज टाटा मोटर्स, रिलायन्स, एचसीएल टेक, टाटा स्टील या दिग्गज शेअर्समध्ये जोरदार वाढ झाली. निफ्टीवरील एल अँड टी, एसबीआय, जिओ फायनान्शियल, अपोलो हॉस्पिटल यामध्येही तेजी पाहायला मिळाली.
गिरणारे शेअर्स:
दुसरीकडे, बजाज फिनसर्व्ह, एसबीआय लाईफ, बजाज फायनान्स, कोटक बँक आणि श्रीराम फायनान्स यांसारख्या शेअर्समध्ये घसरण झाली.
जागतिक बाजाराचा सकारात्मक प्रभाव:
सकाळी GIFT निफ्टी १०० अंकांनी वधारून २५,७०० च्या वर होता. अमेरिकन बाजाराने काल जोरदार तेजी दाखवली. डाउ जोंस ४०० अंकांनी वाढून चार महिन्यांच्या उच्चांकावर पोहोचला, तर नॅस्डॅक २०० अंकांनी वधारला. S&P ५०० निर्देशांक विक्रमी उच्चांकाच्या जवळ बंद झाला. जपानचा निक्केई निर्देशांकही ६०० अंकांनी उसळला.
जुलै सीरिजची सकारात्मक सुरुवात, जागतिक बाजाराचा दमदार आधार आणि देशांतर्गत सकारात्मक आर्थिक संकेत यांच्या जोरावर बाजारात आज उत्साही वातावरण होते. गुंतवणूकदारांचा कल लार्जकॅप आणि टेक शेअर्सकडे अधिक राहिल्याचे दिसून आले.
