माणदेश एक्सप्रेस न्यूज | मुंबई :
राज्यात महापालिका व स्थानिक स्वराज्य संस्थांच्या निवडणुकीचा बिगुल वाजला असून सर्वत्र राजकीय समीकरणांमध्ये उलथापालथ सुरू झाली आहे. नंदुरबार जिल्ह्यातही त्याचे मोठे पडसाद उमटू लागले आहेत. या पार्श्वभूमीवर अक्कलकुवा तालुक्यात शिवसेना (शिंदे) गटाला मोठा धक्का बसला आहे. कुकडखुंट येथे शिवसेना शिंदे गटाचे सरपंच, उपसरपंच, ग्रामपंचायत सदस्य यांच्यासह अनेक कार्यकर्त्यांनी माजी खासदार डॉ. हिना गावित यांच्या उपस्थितीत भाजपात प्रवेश केला आहे. या घडामोडींमुळे आमदार आमश्या पाडवी यांना निवडणुकीच्या तोंडावर मोठा फटका बसल्याचे मानले जात आहे.
डॉ. हिना गावित यांनी अलीकडेच भाजपमध्ये पुनरागमन केले आणि तत्काळ जिल्ह्यातील राजकारणात नवीन उर्जा आली आहे. त्यांच्या नेतृत्वाखाली परिसरातील अनेक कार्यकर्ते भाजपशी जोडले जात आहेत. विशेष म्हणजे केवळ शिवसेना शिंदे गटच नव्हे तर काँग्रेसमधील अनेक पदाधिकारी, कार्यकर्त्यांनीही कमळाचे चिन्ह स्वीकारले आहे. अक्कलकुवा व धडगाव तालुक्यात हे इनकमिंग सातत्याने सुरू असून, स्थानिक स्वराज्य निवडणुकांमध्ये भाजप मजबूत होत असल्याची चिन्हे स्पष्ट दिसत आहेत.
या प्रवेश सोहळ्यानंतर बोलताना डॉ. हिना गावित म्हणाल्या, “जिल्ह्यातील जनतेचा विश्वास हेच आमचे बळ आहे. अनेकांनी आज कमळाचा विचार स्वीकारला आहे. येणाऱ्या काळातही विविध पक्षातील कार्यकर्ते मोठ्या संख्येने भाजपमध्ये सामील होतील. या इनकमिंगमुळे भाजपा निश्चितच अव्वल स्थान मिळवेल,” असा विश्वास त्यांनी व्यक्त केला.
नंदुरबार जिल्ह्यात महायुतीत मोठी फूट पडल्याचे अधिकृतपणे स्पष्ट झाले आहे. डॉ. गावित यांनी जाहीर केले की नंदुरबार आणि अक्कलकुवा विधानसभा मतदारसंघात भाजप-शिवसेना (शिंदे गट) यांची युती होणार नाही.
त्यांच्या मते, जिल्ह्याची राजकीय परिस्थिती पाहता शिवसेना शिंदे गटच प्रमुख प्रतिस्पर्धी आहे. त्यामुळे या दोन्ही मतदारसंघांत महायुती युतीतून नाही तर थेट सामना होणार आहे.
तर शहादा आणि तळोदा मतदारसंघातील युतीचा निर्णय स्थानिक आमदार राजेश पाडवी घेतील, असेही त्यांनी स्पष्ट केले. “जिल्ह्याचा राजकीय निर्णय आम्हालाच दिला गेला आहे. परिस्थितीचे सखोल विश्लेषण करूनच पावले उचलत आहोत,” असे डॉ. गावित म्हणाल्या.
अक्कलकुवा व नंदुरबार परिसरातील सध्याच्या राजकीय घडामोडींमुळे शिंदे गटामध्ये खळबळ उडाली आहे. कार्यकर्त्यांचा सततचा ओघ भाजपकडे वळू लागल्याने स्थानिक पातळीवर शिंदे गटाचे नेतृत्व बचावात्मक भूमिकेत दिसत आहे. आगामी निवडणुकांमध्ये हा तोटा मोठा ठरू शकतो, अशी चर्चा राजकीय वर्तुळात सुरू आहे.
एकीकडे महायुती सरकार राज्यात सत्तेत असले तरी, जिल्ह्याच्या पातळीवरील निर्णयांमुळे युतीत तणाव वाढल्याचे स्पष्ट झाले आहे. नंदुरबारमध्ये भाजपाने स्पष्टपणे स्वतंत्र लढाईची घोषणा केल्याने शिवसेना शिंदे गटावर दबाव वाढला आहे. हा निर्णय इतर जिल्ह्यांवरही परिणाम करू शकतो, असा राजकीय अंदाज वर्तविला जात आहे.
स्थानिक नेतृत्व मजबूत असलेल्या नंदुरबार जिल्ह्यातील या घडामोडींचा थेट परिणाम आगामी नगरपरिषद, पंचायत समिती, जिल्हा परिषद आणि महापालिका निवडणुकांवर होणार आहे. कार्यकर्त्यांचे स्थलांतर, शिंदे गटातील अस्वस्थता, भाजपचे वाढलेले संघटन आणि डॉ. हिना गावित यांची aggressive भूमिका… अशा तिहेरी प्रभावामुळे राजकीय समीकरणे बदलण्याची दाट शक्यता आहे.
