माणदेश एक्सप्रेस न्यूज नेटवर्क
रशियाच्या पूर्वेकडील कमचटका बेटाजवळ शनिवारी सकाळी पुन्हा एकदा भूकंपाचे जोरदार धक्के जाणवले. युनायटेड स्टेट्स जिओलॉजिकल सर्व्हे (USGS) नुसार, या भूकंपाची तीव्रता ७.४ रिश्टर स्केलवर नोंदवली गेली असून त्याचा केंद्रबिंदू कमचटका शहरापासून सुमारे १११ किलोमीटर अंतरावर, उत्तर प्रशांत महासागराच्या खोल भागात होता. स्थानिक वेळेनुसार पहाटे २ वाजून ३७ मिनिटांनी झालेल्या या भूकंपामुळे लोकांमध्ये भीतीचे वातावरण निर्माण झाले आहे.
प्रशांत महासागर किनाऱ्यालगतच्या अनेक देशांना त्सुनामीचा संभाव्य धोका असल्याने सतर्कतेचा इशारा देण्यात आला आहे. रशियन प्रशासनासह जपान, अमेरिका, तसेच पॅसिफिक बेट देशांच्या हवामान आणि भूकंप निरीक्षण विभागांनी समुद्रातील हालचालींवर काटेकोर लक्ष ठेवण्यास सुरुवात केली आहे.
सुदैवाने, आतापर्यंत कोणतीही जीवितहानी किंवा मोठ्या प्रमाणात नुकसान झाल्याचे वृत्त नाही. तरीदेखील, स्थानिक प्रशासनाने किनारी भागातील नागरिकांना सतर्क राहण्याचे आवाहन केले आहे.
याच कमचटका भागात यावर्षी जुलै महिन्यात ८.८ रिश्टर स्केलचा शक्तिशाली भूकंप झाला होता. त्या वेळी पॅसिफिक महासागर किनाऱ्यावर त्सुनामीचा इशारा देण्यात आला होता आणि अमेरिकेतील हवाई, अलास्का, कॅलिफोर्निया तसेच पश्चिम किनाऱ्यावरील राज्यांमध्ये आपत्कालीन स्थिती घोषित करण्यात आली होती. USGS नुसार, जुलैचा हा भूकंप गेल्या १४ वर्षांतील जगातील सर्वात शक्तिशाली भूकंप ठरला होता.
कमचटका बेटाजवळील परिसर जगातील सर्वाधिक भूकंपीय सक्रिय पट्ट्यांपैकी एक मानला जातो. १९५२ मध्ये सोव्हिएत काळात या प्रदेशात ९.० रिश्टर स्केलचा विनाशकारी भूकंप झाला होता, जो इतिहासातील सर्वात शक्तिशाली भूकंपांपैकी एक ठरला होता. त्यावेळी पॅसिफिक किनाऱ्यावरील अनेक देशांमध्ये त्सुनामीचा मोठा कहर झाला होता.
अलिकडेच अफगाणिस्तानात झालेल्या ६.० रिश्टर स्केलच्या भूकंपामुळे शेकडो लोकांचा मृत्यू झाला, तर हजारो नागरिक जखमी झाले होते. त्यातून हे स्पष्ट होते की कमी तीव्रतेचे भूकंपही पर्वतीय वस्ती असलेल्या प्रदेशात मोठा विध्वंस घडवून आणू शकतात.
नव्या धक्क्यांनंतर कमचटका तसेच प्रशांत महासागर किनाऱ्यावरील सर्व संवेदनशील प्रदेशांमध्ये सतर्कतेचे आदेश देण्यात आले आहेत. त्सुनामी निरीक्षण केंद्र समुद्रातील पाण्याची पातळी आणि हालचालींवर सतत लक्ष ठेवून असून, कोणत्याही प्रकारचा अनर्थ टाळण्यासाठी आपत्कालीन यंत्रणा सज्ज आहे.
