माणदेश एक्सप्रेस न्यूज | नवी दिल्ली :
गेल्या काही महिन्यांपासून महागाईच्या झटक्यामुळे सामान्य माणसाचे घरगुती अर्थकारण डळमळलेले असताना केंद्र सरकारने घेतलेला एक महत्त्वपूर्ण निर्णय ग्राहकांना मोठा दिलासा देणार आहे. जीएसटी परिषदेकडून दैनंदिन वापराच्या वस्तूंवरील करदरात कपात करण्यात आली असून, याचा थेट फायदा लोकांना होणार आहे.
आघाडीच्या कंपन्यांनी आपल्या उत्पादनांच्या किमती कमी करण्याची घोषणा केली आहे. त्यामुळे साबण, शाम्पू, टूथपेस्ट, बिस्किट्स, कॉफी, आइस्क्रीमपासून ते इलेक्ट्रॉनिक्स आणि वाहनांपर्यंतच्या खरेदीत ग्राहकांना थेट बचत होणार आहे.
कपातीचा सर्वाधिक परिणाम अन्नपदार्थ, स्नॅक्स आणि रोजच्या वापराच्या वस्तूंवर दिसणार आहे.
लोणी, चीज, स्नॅक्स: करदर १२% वरून ५%
चॉकलेट्स, बिस्किट्स, कॉर्न फ्लेक्स, कॉफी, आइस्क्रीम: ५% जीएसटी
केसांचे तेल, शाम्पू, साबण, शेव्हिंग क्रीम, टूथपेस्ट: ५% जीएसटी
यामुळे किराणा दुकानातील बिल सरळ ८-१०% ने कमी होण्याची शक्यता व्यक्त केली जात आहे.
दरकपातीचा लाभ थेट ग्राहकांपर्यंत पोहोचवण्यासाठी देशातील आघाडीच्या कंपन्यांनी स्पष्ट भूमिका घेतली आहे.
हिंदुस्तान युनिलिव्हरच्या प्रिया नायर म्हणाल्या :
“जीएसटी दरकपातीमुळे कररचना सोपी होईल आणि वस्तू अधिक सहज उपलब्ध होतील. आम्ही हा लाभ थेट ग्राहकांपर्यंत पोहोचवणार आहोत.”आयटीसीचे हेमंत मलिक :
“आम्ही किमती कमी करू किंवा उत्पादनाचे ग्रॅमेज वाढवू. त्यामुळे ग्राहकांना अधिक फायदा मिळेल.”पार्ले प्रॉडक्ट्सचे अरूप चौहान :
“किमती कमी करून किंवा जास्त ग्रॅमेज देऊन आम्ही हा फायदा ग्राहकांपर्यंत पोहोचवणार आहोत. हा बदल भारताच्या अर्थव्यवस्थेला मोठा बूस्टर ठरेल.”
करकपातीचा परिणाम फक्त घरगुती वस्तूंवरच नव्हे तर वाहन उद्योगावरही दिसून येतो आहे.
टाटा मोटर्स: प्रवासी वाहनांवर ₹१.५५ लाखांपर्यंत कपात (नव्या किमती २२ सप्टेंबरपासून लागू).
महिंद्रा अँड महिंद्रा: प्रवासी वाहन श्रेणीत ₹१.५६ लाखांपर्यंत कपात (६ सप्टेंबरपासून लागू).
रेनॉ इंडिया: ९६ हजार रुपयांपर्यंत किंमत कमी.
यामुळे ग्राहकांसाठी गाडी खरेदी करणे अधिक परवडणारे ठरणार आहे.
तज्ज्ञांच्या मते, करकपातीमुळे केवळ दैनंदिन वस्तू स्वस्त होणार नाहीत, तर लोकांची खरेदी क्षमता वाढेल. महागाईचा भार थोडा कमी झाल्यामुळे मागणी वाढेल. किराणा, स्नॅक्स, घरगुती वस्तूंसह इलेक्ट्रॉनिक्स आणि वाहन क्षेत्रात विक्रीत वाढ होईल.
महागाईच्या दबावाखाली मागणी घटलेली असताना, या निर्णयामुळे बाजाराला चालना मिळेल आणि अर्थव्यवस्थेत नवीन ऊर्जा निर्माण होईल, असे अर्थतज्ज्ञांचे म्हणणे आहे.
रोजच्या वापराच्या वस्तूंवरील करकपात म्हणजे सरळसोट बचत. साबण, टूथपेस्ट, बिस्किट्ससारख्या वस्तूंवर छोट्या स्वरूपात का होईना पण महत्त्वाचा दिलासा मिळेल. तर वाहन खरेदीच्या विचारात असलेल्या ग्राहकांना लाखो रुपयांची बचत होणार आहे.
महागाईने हैराण झालेल्या ग्राहकांसाठी हा निर्णय ‘गोड दिलासा’ ठरणार आहे, असे स्पष्टपणे दिसून येत आहे.
