माणदेश एक्सप्रेस न्यूज | आरोग्य विशेष
भारतातील दैनंदिन जीवनात सकाळचा चहा हा अनेकांसाठी अविभाज्य भाग बनलेला आहे. उठल्या उठल्या गरमागरम चहा प्यायल्याशिवाय दिवसाची सुरुवात होत नाही, असे अनेक जण सांगतात. मात्र आरोग्य तज्ज्ञांच्या मते ही सवय हळूहळू शरीरावर दुष्परिणाम करू शकते. विशेषतः रिकाम्या पोटी घेतलेला चहा अनेक गंभीर समस्या निर्माण करतो.
पचनशक्तीवर परिणाम
चहामध्ये असणारे कॅफिन पोटातील आम्लनिर्मितीला चालना देते. त्यामुळे रिकाम्या पोटी चहा घेतल्यास गॅस, आम्लपित्त, पोट फुगणे आणि अपचन अशा समस्या वाढतात. दीर्घकाळ ही सवय ठेवल्यास पचनतंत्र कमकुवत होऊ शकते.
पोषणशक्ती कमी होते
तज्ज्ञ सांगतात की चहातील कॅफिन शरीरातील आयर्नसह काही पोषक तत्त्वांचे शोषण कमी करते. परिणामी अशा व्यक्तींना अॅनिमियाचा धोका निर्माण होतो. विशेषतः महिलांमध्ये ही समस्या अधिक प्रमाणात आढळते.
शरीर डिहायड्रेट होतो
चहाला डाएयुरेटिक गुणधर्म असतात, म्हणजेच शरीरातील पाणी लघवीतून जास्त प्रमाणात बाहेर टाकले जाते. त्यामुळे सकाळी उठल्यावर रिकाम्या पोटी चहा घेतल्यास डिहायड्रेशन, थकवा, कमजोरी आणि त्वचेच्या समस्या निर्माण होतात.
हार्मोन्स असंतुलित होतात
रिकाम्या पोटी चहा घेतल्याने शरीरातील स्ट्रेस हार्मोन्स वाढतात. यामुळे चिडचिड, मूड स्विंग्स, डोकेदुखी आणि अनिद्रा यांसारख्या समस्या होऊ शकतात.
दात आणि हाडांवर परिणाम
चहातील घटकांमुळे दीर्घकाळ दात पिवळसर होतात. जास्त प्रमाणात व रिकाम्या पोटी घेतलेल्या चहामुळे हाडांची घनता कमी होऊन हाडं कमजोर होण्याचा धोका संभवतो.
भूक मंदावते
चहा घेतल्यावर नैसर्गिक भूक लागत नाही, त्यामुळे सकाळच्या जेवणात आवश्यक पोषण मिळत नाही. कालांतराने शरीरात पोषणतुटीची समस्या वाढू शकते.
तज्ज्ञांचा सल्ला
सकाळी उठल्यावर सर्वप्रथम कोमट पाणी किंवा लिंबूपाणी घेणे हितावह.
चहा घेतलाच तर नाश्ता झाल्यानंतर घ्यावा.
दिवसातून २–३ पेक्षा जास्त वेळा चहा घेणे टाळावे.
पोषणतज्ज्ञांच्या मते, चहा ऐवजी हर्बल टी, ग्रीन टी किंवा ताज्या फळांचा रस हा अधिक आरोग्यदायी पर्याय आहे.
रिकाम्या पोटी चहा पिण्याची सवय जरी क्षणिक ताजेतवाने वाटली तरी दीर्घकाळ आरोग्यावर गंभीर परिणाम करू शकते. त्यामुळे सवयीमध्ये बदल करून शरीराचं आरोग्य जपणं गरजेचं आहे.
