माणदेश एक्सप्रेस न्यूज | पुणे :
पुणे शहरात दिवसेंदिवस वाढत असलेल्या गुन्हेगारी घटनांमुळे नागरिकांच्या सुरक्षेचा प्रश्न अधिकच गंभीर बनला आहे. नुकतीच घडलेली एक धक्कादायक घटना याचाच पुरावा ठरली आहे. येरवडा परिसरातील लक्ष्मीनगर येथे रविवारी सकाळी चार तरुणांनी एका महिलेस आणि तिच्या मुलावर थेट घरात घुसून धारदार शस्त्राने जीवघेणा हल्ला केला. या घटनेने संपूर्ण परिसर हादरला असून नागरिकांमध्ये भीतीचं वातावरण निर्माण झालं आहे.
मिळालेल्या माहितीनुसार, येरवड्यातील लक्ष्मीनगर भागात राहणाऱ्या रहीसा महंमद शेख या महिलेने पोलिसात तक्रार दाखल केली आहे. रविवारी सकाळी अचानक चार तरुण — जहूर शेख (वय २८), सुलतान खान (वय २०), आझाद खान (वय २२) आणि मुस्तफा खान (वय २१) — हे घरात घुसले. आत शिरताच त्यांनी कोणत्याही पूर्वसूचनेशिवाय ‘माझ्या आईला का मारलं?’ असा प्रश्न विचारत आक्रमक पवित्रा घेतला आणि आरोपी जहूर शेख याने हातातली तलवार काढून थेट रहीसा शेख यांच्यावर हल्ला चढवला.
यावेळी हस्तक्षेप करण्याचा प्रयत्न करणाऱ्या रहीसांच्या मुलावरही त्यांनी प्राणघातक हल्ला केला. फक्त एवढ्यावरच हे थांबले नाहीत, तर इतर आरोपींनी घरातील फर्निचर फोडलं, भांडी, काचसामान फेकून दिलं आणि घरात मोठ्या प्रमाणावर नुकसान केलं. तसेच आरोपींनी गलिच्छ शिवीगाळ करत महिलेला धमक्या दिल्या.
घरातून आरडाओरड आणि वस्तू फोडण्याचा आवाज ऐकून शेजाऱ्यांनी तत्काळ धाव घेतली. त्यांनी बघितलं तर रहीसा शेख रक्ताच्या थारोळ्यात पडलेल्या होत्या. नागरिकांनी लगेच पोलिसांना आणि 108 रुग्णवाहिकेला कळवले. काही मिनिटांतच येरवडा पोलिस ठाण्याचे पथक घटनास्थळी दाखल झाले आणि जखमींना तातडीने रुग्णालयात हलवण्यात आलं. डॉक्टरांनी सांगितले की, दोघांचीही प्रकृती सध्या स्थिर आहे.
या घटनेनंतर येरवडा परिसरात तणावाचे वातावरण निर्माण झाले आहे. पोलिसांनी घटनास्थळाचा पंचनामा करून जहूर शेख, सुलतान खान, आझाद खान आणि मुस्तफा खान या चारही आरोपींविरुद्ध खूनाचा प्रयत्न, घरफोडी आणि सार्वजनिक शांतता भंग यांसह इतर गंभीर कलमांखाली गुन्हा दाखल केला आहे.
पोलिसांच्या प्राथमिक चौकशीत या हल्ल्यामागचं कारण कौटुंबिक वादाशी संबंधित असावं, असा संशय व्यक्त केला जात आहे. मात्र, अचूक कारण स्पष्ट होण्यासाठी पोलिस अधिक तपास करत आहेत. परिसरातील सीसीटीव्ही फुटेज आणि प्रत्यक्षदर्शींच्या जबाबांवरून आरोपींच्या हालचालींचा तपास सुरू आहे.
या घटनेने पुन्हा एकदा पुण्यातील सुरक्षाव्यवस्थेवर प्रश्नचिन्ह उभं राहिलं आहे. दिवसाढवळ्या घरात घुसून शस्त्रांनी हल्ला करणाऱ्या गुंडांना पोलिसांनी कठोर शिक्षा मिळावी, अशी मागणी स्थानिक नागरिकांनी केली आहे.
पुणे पोलिसांकडून सातत्याने गुन्हे रोखण्यासाठी पथके नेमली जात असली तरीही अशा घटनांमुळे कायदा-सुव्यवस्थेवरील विश्वास डळमळीत होताना दिसतो. दिवसाढवळ्या घरात घुसून हल्ला करणाऱ्यांना तातडीने अटक करून कठोर शिक्षा देण्याची गरज आहे, अन्यथा अशा गुन्हेगारी वृत्तीला अधिक चालना मिळेल.
