माणदेश एक्सप्रेस न्यूज | कोल्हापूर :
राज्यातील फार्मसी प्रवेश प्रक्रियेचे पुन्हा एकदा गणित बिघडले असून हजारो विद्यार्थी व पालक मोठ्या संकटात सापडले आहेत. फार्मसी कौन्सिल ऑफ इंडिया (PCI) कडून अद्याप प्रवेश धोरण निश्चित न झाल्याने संपूर्ण प्रक्रिया उशीराने सुरू होण्याची शक्यता निर्माण झाली आहे. परिणामी विद्यार्थ्यांना डिसेंबरपासूनच प्रवेश मिळण्याची शक्यता असून, यामुळे पहिल्या सत्राची परीक्षा होणे अशक्य झाले आहे. विद्यार्थ्यांना एकाच सत्रात वर्षभराचा अभ्यासक्रम पूर्ण करून दोन परीक्षा द्याव्या लागणार आहेत, ही परिस्थिती शिक्षणाच्या गुणवत्तेला धक्का देणारी ठरत आहे.
प्रवेश क्षमतेचा मोठा प्रश्न
शिवाजी विद्यापीठ कार्यक्षेत्रात बी.फार्मसीची तब्बल 38 महाविद्यालये असून, एकूण 2400 प्रवेश क्षमता आहे.
एम.फार्मसीच्या 23 महाविद्यालयांत 1,310 जागा आहेत.
मात्र, प्रवेश प्रक्रिया वेळेवर सुरू न झाल्याने या जागा रिक्त राहण्याची भीती आहे.
बारावीचा निकाल मे महिन्यात लागून तीन महिने उलटले तरीही सीईटी सेलकडून प्रवेशाचे वेळापत्रक जाहीर झालेले नाही. वारंवार मुदतवाढ दिल्याने विद्यार्थी आणि पालक गोंधळलेले आहेत.
गेल्या दोन वर्षांपासून मान्यता प्रक्रियेत होणाऱ्या विलंबामुळे महाविद्यालयांना वेळेवर प्रवेश सुरू करता आलेले नाहीत. यंदाही हीच परिस्थिती निर्माण होण्याची चिन्हे आहेत. दिवाळीनंतरच प्रवेशाला सुरुवात होईल, असा अंदाज शिक्षणतज्ज्ञ व्यक्त करत असून प्रक्रिया डिसेंबरपर्यंत लांबेल, अशी भीती आहे. त्यामुळे पहिल्या सत्रातील परीक्षा पुढे ढकलावी लागेल.
मागील वर्षीही प्रवेश प्रक्रियेत झालेल्या विलंबामुळे फार्मसीच्या 58 टक्के जागा रिक्त राहिल्या होत्या. अनेक विद्यार्थ्यांनी पर्याय म्हणून इतर व्यावसायिक अभ्यासक्रमांकडे वळण्याचा निर्णय घेतला होता. यंदाही तीच परिस्थिती उद्भवण्याची शक्यता नाकारता येत नाही.
प्रवेश प्रक्रियेत होणाऱ्या सततच्या विलंबामुळे विद्यार्थी व पालकांमध्ये प्रचंड नाराजी आहे.
“दरवर्षी उशीर होतो, यामुळे आमचं शैक्षणिक वर्ष वाया जातं. भविष्यातील करिअर धोक्यात येतंय,” अशी प्रतिक्रिया विद्यार्थ्यांनी दिली.
“सरकार व PCI ने एकदाच ठोस धोरण ठरवावे, जेणेकरून दरवर्षी हा गोंधळ होणार नाही,” अशी मागणी पालकांकडून होत आहे.
सध्याच्या परिस्थितीकडे पाहता फार्मसीच्या प्रवेश प्रक्रियेला लागलेला उशीर हा केवळ औपचारिकता नसून, विद्यार्थ्यांच्या शैक्षणिक भवितव्याशी निगडीत गंभीर प्रश्न आहे.
वर्षभराचा अभ्यासक्रम सहा महिन्यांत पूर्ण करण्याची वेळ आल्यास शिक्षणाची गुणवत्ता कमी होणार आहे.
परीक्षांचे वेळापत्रक गडबडीत पार पडल्यास विद्यार्थ्यांचा ताण वाढणार आहे.
सततची अनिश्चितता राहिल्यास फार्मसी अभ्यासक्रमावरील विद्यार्थ्यांचा विश्वास कमी होण्याचा धोका आहे.
शिक्षणतज्ज्ञांचे मत आहे की, फार्मसीसारख्या व्यावसायिक अभ्यासक्रमात प्रवेश प्रक्रिया वेळेवर न झाल्यास थेट उद्योगक्षेत्रालाही फटका बसतो. कारण, औषधनिर्मिती व वैद्यकीय क्षेत्रात कुशल पदवीधरांची गरज प्रचंड आहे. अशा वेळी प्रवेश प्रक्रियेत होणारा उशीर हा राष्ट्रीय पातळीवरही गंभीर मुद्दा आहे.
