माणदेश एक्सप्रेस न्यूज | सोलापूर :
शहरातील न्यू बुधवार पेठ परिसरात मंगळवारी (दि. १४) सकाळी घडलेल्या एका खळबळजनक घटनेने संपूर्ण परिसरात एकच खळबळ उडाली आहे. अनैतिक संबंधाच्या संशयावरून पतीने पत्नीचा चाकूने वार करून खून केल्याची धक्कादायक घटना उघडकीस आली आहे. या प्रकरणी पोलिसांनी आरोपी पतीला काही तासांतच अटक केली असून, पुढील तपास सुरू आहे.
मिळालेल्या माहितीनुसार, न्यू बुधवार पेठेतील रमाबाई आंबेडकर नगर येथे राहणारी यशोदा सुहास सिद्धगणेश (वय ३५) ही सकाळी आपल्या घरात कामात व्यस्त असताना तिचा पती सुहास तुकाराम सिद्धगणेश (वय ४३) याने चारित्र्याच्या संशयावरून वाद घातला. वादाचे रूपांतर क्षणात हिंसाचारात झाले आणि सुहास याने स्वयंपाकघरातील चाकू उचलून यशोदा हिच्यावर वार केले. तिच्या गळ्यावर आणि पोटावर गंभीर स्वरूपाचे वार झाल्याने ती रक्ताच्या थारोळ्यात कोसळली.
घटनेच्या वेळी शेजारील रहिवासी अन्नपूर्णा नीलकंठ बाळशंकर (वय ५०) यांनी घरातून येणाऱ्या आरडाओरड ऐकून त्या ठिकाणी धाव घेतली. त्यावेळी आरोपी सुहास हा हातात चाकू घेऊन यशोदा हिच्यावर वार करीत होता. अन्नपूर्णा यांनी त्याला थांबविण्याचा प्रयत्न केला असता, “आमच्या दोघात कोणी आलं तर त्यालाही खल्लास करेन,” अशी धमकी देत आरोपीने त्यांनाही दूर हटवले. त्यानंतर तो घटनास्थळावरून पसार झाला.
जखमी यशोदा हिला तातडीने शासकीय रुग्णालयात दाखल करण्यात आले; मात्र डॉक्टरांनी तपासून तिला मृत घोषित केले. या घटनेनंतर परिसरात मोठी गर्दी जमली. पोलिसांनी घटनास्थळी धाव घेत पंचनामा केला आणि तात्काळ तपासाची चक्रे फिरवली.
जोडभावी पोलीस ठाण्याचे पथक तातडीने हालचाल करून काही तासांतच आरोपी सुहास सिद्धगणेश यास अटक करण्यात यश मिळवले. पोलिसांनी त्याच्याकडून खून करण्यात वापरलेला चाकूही जप्त केला आहे. प्राथमिक तपासात, चारित्र्याच्या संशयावरून पती-पत्नीमध्ये सातत्याने वाद होत होते, अशी माहिती समोर आली आहे. अखेर या वादाचा शेवट खूनात झाला.
यशोदा आणि सुहास या दांपत्याला दोन मुली आणि एक मुलगा आहे. आईच्या मृत्यूमुळे तीनही मुले आघातात असून, कुटुंबावर दुःखाचा डोंगर कोसळला आहे. या घटनेने न्यू बुधवार पेठ परिसरात शोककळा पसरली आहे.
या प्रकरणी फिर्यादी अन्नपूर्णा बाळशंकर यांनी जोडभावी पोलीस ठाण्यात तक्रार दाखल केली असून, पोलीस निरीक्षक गायकवाड यांच्या मार्गदर्शनाखाली सहाय्यक पोलीस निरीक्षक गायकवाड अधिक तपास करीत आहेत.
या घटनेमुळे पुन्हा एकदा संशय, हिंसाचार आणि कौटुंबिक तणावाचे दुष्परिणाम समोर आले आहेत. एका क्षणिक रागाने आणि अविचारी निर्णयाने एक संसार उद्ध्वस्त झाला, तीन लहान मुलांच्या आयुष्यावर कायमचा परिणाम झाला आहे.
