माणदेश एक्सप्रेस न्यूज | परळी वैजनाथ :
परळी वैजनाथ शहर हादरवून टाकणारी आणि माणुसकीलाच काळिमा फासणारी घटना रविवारी उघडकीस आली. रेल्वे स्थानक परिसरात केवळ पाच वर्षांच्या निरागस चिमुकलीवर बलात्कार झाल्याने संपूर्ण शहर संतापले आहे. घटनेनंतर परळीकरांनी एकजुटीने शहर बंद पाळत निषेध नोंदवला असून आज सकाळी राणी लक्ष्मीबाई टॉवर येथून निघालेल्या मूक मोर्चात नागरिकांचा प्रचंड जनसागर उसळला.
पंढरपूर येथील एक मजूर जोडपे कामाच्या शोधात परळीत आले होते. पती-पत्नी पाच वर्षांच्या मुलीसोबत रेल्वे स्थानकात पोहोचले. आई तब्येत बिघडल्यामुळे मुलीसोबत रेल्वे स्थानकात झोपली होती, तर वडील जवळच दुसरीकडे गेले होते. याच संधीचा फायदा घेत एका अज्ञात व्यक्तीने मुलीला उचलून नेले. नंतर त्या चिमुकलीवर अमानुष अत्याचार करण्यात आला.
रडत परत आईकडे आलेल्या मुलीच्या गुप्तांगातून रक्तस्राव होत असल्याचे दिसताच आईने तिला तातडीने उपजिल्हा रुग्णालयात नेले. डॉक्टरांच्या प्राथमिक तपासणीत लैंगिक अत्याचार झाल्याचे स्पष्ट झाले. पोलिसांनी तात्काळ कारवाई करत आरोपीला अटक केली आहे.
या भयानक घटनेनंतर परळी शहरात प्रचंड संतापाचे वातावरण पसरले आहे. सर्व व्यापारी, डॉक्टर, सामाजिक संस्था, तसेच राजकीय नेते यांच्यासह परळीकरांनी एकमुखाने शहर बंद ठेवले.
आरोपीला कठोर शिक्षा द्यावी,
फास्टट्रॅक कोर्टात खटला चालवावा,
आरोपीला फाशीची शिक्षा मिळावी,
या मागण्यांसाठी नागरिक एकत्र आले आहेत.
आज सकाळी दहा वाजता राणी लक्ष्मीबाई टॉवर येथून निघालेल्या मूक मोर्चात नागरिकांची लाखोंची गर्दी उसळली. व्यापारी, डॉक्टर, वकील, समाजसेवक, राजकीय नेते, सामाजिक संस्था आणि सर्व धर्मीय बंधु-भगिनी या मूक मोर्चात सहभागी झाले. स्त्री-पुरुष, तरुण, विद्यार्थी मोठ्या संख्येने सहभागी झाल्याने शहरातील प्रत्येक रस्ता लोकांनी फुलून गेला होता.
हा मोर्चा उपविभागीय अधिकारी कार्यालयावर पोहोचून संपला. तेथे नागरिकांच्या वतीने निवेदन देण्यात आले. आरोपीला फाशी देऊन पीडितेला न्याय मिळवून द्यावा, या मागणीवर सर्व समाज एकवटल्याचे चित्र दिसले.
या संतापजनक घटनेनंतर परळी शहर हादरून गेले आहे. नागरिकांमध्ये प्रचंड अस्वस्थता आणि रोष व्यक्त होत आहे. “चिमुकलीवर असा अमानुष अत्याचार करणाऱ्याला कोणतीही दया न दाखवता थेट फाशी द्यावी,” अशी एकमुखाने मागणी होत आहे.
पोलिसांनी आरोपीला ताब्यात घेतले असून तपास जलदगतीने सुरू आहे. दरम्यान, पीडित मुलीवर परळी उपजिल्हा रुग्णालयात उपचार सुरू आहेत. तिची प्रकृती सध्या स्थिर असल्याचे सांगण्यात आले.
👉 या घटनेमुळे परळीच नव्हे तर संपूर्ण बीड जिल्ह्यात संतापाचे वातावरण असून “अत्याचार्यांना फाशीच हवी” हीच एकच हाक सध्या सर्वत्र उमटत आहे.
