माणदेश एक्सप्रेस न्यूज | कोल्हापूर :
महाराष्ट्र लोकसेवा आयोगाच्या (MPSC) राज्यसेवा मुख्य परीक्षेत कोल्हापूर जिल्ह्याने पुन्हा एकदा आपल्या गुणवंतांचा ठसा उमटवला आहे. इचलकरंजीचा तन्मय अनिल मांडरेकर याने OBC प्रवर्गातून राज्यात प्रथम क्रमांक पटकावत ऐतिहासिक कामगिरी केली आहे. तर कसबा बावड्याची सायली किरन भोसले हिने अनुसूचित जाती प्रवर्गातील मुलींमध्ये राज्यात द्वितीय क्रमांक पटकावून कोल्हापुराचा मान उंचावला आहे.
या सोबतच आदमापूरचे सतेज पाटील, राशिवडे बुद्रुकचे सुशांत लाड, अजय तोडकर, राहुल आपटे आणि सूरज डेबजे या कोल्हापूरातील प्रतिभावंतांनीही यश संपादन केले आहे. २०२४ मध्ये झालेल्या परीक्षेनंतर एकूण १,५१६ उमेदवार मुलाखतीसाठी पात्र ठरले होते. त्यानंतर ३० ऑक्टोबरपर्यंत मुलाखतीची प्रक्रिया पूर्ण करून सर्वसाधारण गुणवत्ता यादी जाहीर करण्यात आली.
सायली भोसले — ‘जिद्द, शिस्त आणि १२ तासांचा अभ्यास’
प्रेरणादायी वाटचाल करणारी सायली भोसले ही कोल्हापुरातील नेजदार कॉलनीची रहिवासी. म.ल.ग. हायस्कूलमधून माध्यमिक आणि उच्च माध्यमिक शिक्षण घेतल्यानंतर तिने पनवेलमधून ईएनटीसी अभियांत्रिकीची पदवी मिळवली.
२०२० पासून राज्यसेवेची तयारी करणाऱ्या सायलीने पुण्यात खासगी शिकवणी घेऊन अभ्यास केला. मुख्य परीक्षेत यश मिळाल्यानंतर तिने विद्याप्रबोधिनीमध्ये मुलाखतीची तयारी केली. हा फक्त तिचा दुसरा प्रयत्न आणि त्यातच राज्यात मुलींमध्ये दुसरा क्रमांक!
“जीवनात अशक्य काहीच नाही. फक्त त्यासाठी तयारी आणि सातत्य हवे. मी दररोज १२-१२ तास अभ्यास केला, म्हणून हे यश मिळाले.” — सायली भोसले
सायलीचे वडील सातारा येथील पोलिस निरीक्षक तर आई गृहिणी. मुलीच्या यशावर परिवार आणि परिसरात जल्लोष. भगवा चौकात छत्रपती शिवाजी महाराजांना अभिवादन करून तिची भव्य मिरवणूक काढण्यात आली.
तन्मय मांडरेकर — ‘आईच्या कष्टांचे चीज!’
इचलकरंजीच्या तन्मय मांडरेकरने तिसऱ्याच प्रयत्नात OBC प्रवर्गातून राज्यात प्रथम क्रमांक पटकावला. तन्मयची आई अंगणवाडी सेविका आहे. सध्या तो गटविकास अधिकारी म्हणून सेवा प्रशिक्षण घेत आहे.
“मनात जिद्द आणि कष्टांची तयारी असेल तर कोणतीही शिखरे गाठता येतात.” — तन्मय
तन्मयच्या या यशामुळे मांडरेकर कुटुंबीयांसह संपूर्ण इचलकरंजी अभिमानाने न्हाऊन निघाली आहे.
क्लासशिवाय यश — सुशांत लाडचा अभिमान
राधानगरी तालुक्यातील राशिवडे बुद्रुकचा सुशांत लाड ही अभिमानाची कहाणी. कोणताही क्लास लावला नाही. राजाराम कॉलेजमधून अर्थशास्त्रात पदवी. वडील शेतकरी, आई शिलाईकाम करते.
सध्या सुशांत करनिरीक्षक म्हणून कार्यरत असून स्वावलंबी तयारी, शिस्त आणि चिकाटी यामुळे त्याने यश मिळवले.
सतेज पाटील — ग्रामीण भागातून राज्यसेवेत प्रवेश
आदमापूरचे सतेज पाटील यांनी ७५ वी रँक मिळवून ग्रामीण भागातूनही मोठे स्वप्न पूर्ण होऊ शकते याचा दाखला दिला. शिक्षण टिक्केवाडी आणि मुदाळपासून ते पुण्यापर्यंत; मेहनत आणि ध्येयवेडेपणा यांच्या जोरावर यश मिळवले. पालक दोघेही प्राथमिक शिक्षक.
कोल्हापूरचा पराक्रम — पुढील पिढीसाठी प्रेरणा
कोल्हापूर जिल्ह्यातील या उमेदवारांनी मेहनत, शिस्त, सातत्य, अडथळ्यांवर मात आणि कुटुंबाच्या साथीतून राज्यसेवेतील यश मिळवून तरुणांसाठी आदर्श निर्माण केला आहे.
शॉर्टकट नाही, फक्त कष्ट.
एकाग्रता, सातत्य आणि योग्य मार्गदर्शन म्हणजे यशाची गुरुकिल्ली.
यशाची प्रमुख सूत्रे
दीर्घ अभ्यास (१०–१२ तास)
सतत पुनरावृत्ती आणि चाचण्या
मानसिक तयारी आणि संयम
कुटुंबाची साथ
योग्य मार्गदर्शन व अभ्यास पद्धती
कोल्हापूरने पुन्हा एकदा सिद्ध केले — ग्रामीण–शहरी फरक नसतो, जिद्द असेल तर यश निश्चित! या तरुणांनी जिल्ह्याचा मान वाढवला असून त्यांच्या वाटचालीतून अनेकांना प्रेरणा मिळेल.
