माणदेश एक्सप्रेस न्यूज | पुणे :
राज्यसेवा आयोगाच्या मुख्य परीक्षेचा (MPSC State Services Main Exam 2024) निकाल मंगळवारी (दि. ९ सप्टेंबर) जाहीर झाला. या निकालात राज्यभरातील एकूण १ हजार ५१६ विद्यार्थी अंतिम मुलाखतीस पात्र ठरले आहेत. राज्य प्रशासनातील विविध गट-अ, गट-ब पदांवर नियुक्तीसाठी आयोजित करण्यात आलेल्या या परीक्षेत विद्यार्थ्यांनी मोठ्या उत्साहाने सहभाग घेतला होता.
परीक्षेतील केंद्रनिहाय पात्र विद्यार्थी
निकालानुसार सर्वाधिक विद्यार्थ्यांनी पात्रता मिळवलेले केंद्र म्हणजे पुणे. पुणे केंद्रातून तब्बल १००४ विद्यार्थी मुलाखतीस पात्र झाले आहेत. त्याखालोखाल छत्रपती संभाजीनगर येथील १४३ विद्यार्थी, नाशिक येथील १११, नवी मुंबईतून १०८, तर नागपूरमधून १०४ विद्यार्थी पुढच्या टप्प्यासाठी पात्र ठरले आहेत. सर्वात कमी विद्यार्थी म्हणजे फक्त ४६ विद्यार्थी अमरावती केंद्रातून मुलाखतीसाठी पात्र ठरले.
कट ऑफमध्ये झपाट्याने वाढ
यंदा कट ऑफ गुणांमध्ये मोठी वाढ झाल्याचे समोर आले आहे.
खुल्या गटासाठी ५०७ गुण,
एसईबीसीसाठी ४९० गुण,
ओबीसीसाठी ४८५ गुण,
एनटी गटासाठी ४६३ गुण,
ईडब्ल्यूएस व एससीसाठी ४४५ गुण,
तर एसटीसाठी ४१५ गुण इतका कट ऑफ ठरला आहे.
गेल्या काही वर्षांच्या तुलनेत यंदा कट ऑफ ५०० च्या पुढे गेला आहे. मागील वर्षांत कट ऑफ ४९० च्या आसपास राहायचा, परंतु यंदा तो ५०७ पर्यंत पोहोचला आहे. यावरून स्पर्धा परीक्षा दिवसेंदिवस कठीण आणि आव्हानात्मक बनत चालल्याचे स्पष्ट होत असल्याची प्रतिक्रिया स्पर्धा परीक्षा विद्यार्थी असोसिएशनचे अध्यक्ष महेश घरबुडे यांनी दिली.
विद्यार्थ्यांमध्ये मिश्र प्रतिक्रिया
निकालानंतर पात्र विद्यार्थ्यांमध्ये उत्साहाचे वातावरण असून पुढच्या टप्प्यासाठी तयारी सुरू झाली आहे. मात्र अपात्र ठरलेल्या विद्यार्थ्यांमध्ये निराशा दिसून येत आहे. अनेक विद्यार्थी व पालकांनी आयोगाकडून प्रश्नपत्रिकेतील पारदर्शकतेबाबत कौतुक केले असले, तरी वाढत्या कट ऑफमुळे पुढील काळात आणखी संघर्ष करावा लागणार असल्याची भावना उमटली आहे.
पुढील टप्पा – मुलाखती
आता पात्र ठरलेल्या १ हजार ५१६ विद्यार्थ्यांच्या मुलाखतींचे वेळापत्रक एमपीएससीकडून लवकरच जाहीर केले जाणार आहे. यामध्ये राज्य प्रशासनातील महत्त्वाच्या पदांसाठी पात्र उमेदवारांची अंतिम निवड होणार आहे.
