माणदेश एक्सप्रेस न्यूज
पाथरी (परभणी) :
श्रावण सोमवारच्या पावन दिवशी भक्तिभावाने निघालेल्या कावड यात्रेत आज पहाटे पाथरी-सेलू मार्गावर भीषण अपघात झाला. खेडूळा पाटीजवळ भरधाव कारने यात्रेत घुसून दोन भाविकांचा जागीच मृत्यू झाला, तर दोन जण गंभीर जखमी झाले आहेत. या दुर्दैवी घटनेने यात्रेवर दु:खाचा डोंगर कोसळला असून परिसरात हळहळ व्यक्त होत आहे.
अपघाताची घटना
सोमवार (दि. ११ ऑगस्ट) पहाटे अंदाजे ५ वाजण्याच्या सुमारास सेलूहून पाथरी तालुक्यातील रत्नेश्वर रामपुरी येथे आलेल्या कावड यात्रेतील सुमारे २५० भाविक परतीच्या मार्गावर होते. खेडूळा पाटीजवळ अचानक भरधाव वेगाने आलेली कार थेट यात्रेत घुसली.
या दुर्घटनेत ऋषिकेश अशोक शिंदे (रा. सेलू) आणि एकनाथ गंगाधरराव गजमल (रा. डासाळा, ता. सेलू) हे दोघे जागीच ठार झाले. तर दोन गंभीर जखमींना तातडीने रुग्णालयात हलवून उपचार सुरू आहेत.
पोलिसांची तत्काळ धाव
अपघाताची माहिती मिळताच पाथरी पोलिस ठाण्याचे सहायक पोलीस निरीक्षक सोमनाथ नरके, जैस्वाल, थोरे आणि कर्मचारी यांनी ५.२० वाजता घटनास्थळी धाव घेतली. वाहतूक नियंत्रणासह आवश्यक पंचनामा करून पुढील तपास सुरू करण्यात आला आहे.
कावड यात्रेची पार्श्वभूमी
श्रावण महिन्याच्या औचित्याने संकल्प अखंड हिंदू राष्ट्र समितीतर्फे सेलू येथून कावड यात्रेचे आयोजन करण्यात आले होते. आज सकाळी सेलू शहरातील रेल्वे गेटपासून ही यात्रा सुरू होऊन शंकर लिंग मंदिर व सुरज मोड येथे मिरवणुकीनंतर समाप्त होणार होती.
यासाठी शहरभर फलक, बॅनर लावून धार्मिक वातावरण निर्माण करण्यात आले होते. शेकडो तरुण व भक्त या यात्रेत सहभागी झाले होते. मात्र, पाथरीतील अपघातात दोन भाविकांचा मृत्यू झाल्याची बातमी सेलू येथे पोहोचताच शहरात शोककळा पसरली.
श्रद्धाळूंचा संताप आणि दु:ख
अपघातानंतर श्रद्धाळू व स्थानिकांमध्ये संताप व्यक्त होत आहे. यात्रेच्या सुरक्षेसाठी पुरेशी खबरदारी न घेण्याबाबतही चर्चेला उधाण आले आहे. मृतांच्या कुटुंबीयांवर शोककळा पसरली असून संपूर्ण परिसरात हळहळ व्यक्त होत आहे.
