माणदेश एक्सप्रेस न्यूज | मिरज :
गणेशोत्सवाच्या पार्श्वभूमीवर मिरज शहरात बुधवारी रात्री झालेल्या गणेश आगमन मिरवणुकीत डीजेच्या दणदणाटात एकाचा मृत्यू झाल्याने शहरात खळबळ उडाली आहे. बाबासाहेब कलगुटगी (वय ६०, रा. मिरज) या कार्यकर्त्याचा हृदयविकाराच्या झटक्याने मृत्यू झाला. मिरवणुकीत डीजेचा आवाज कानठळ्या बसवणारा होता. त्याचाच परिणाम कलगुटगी यांच्या हृदयावर झाला असावा, असा प्राथमिक अंदाज आहे.
बुधवारी रात्री नऊ वाजण्याच्या सुमारास मिरज मार्केट परिसरातून वडर गल्ली गणेश मंडळाची मिरवणूक सुरू होती. या मिरवणुकीत मंडळाचा कार्यकर्ता बाबासाहेब कलगुटगी हे ट्रॅक्टरवर बसून मोबाईलवर शुटिंग करत होते. यावेळी डीजेचा दणदणाट सुरू असतानाच ते अचानक ट्रॅक्टरवरून कोसळले. उपस्थित कार्यकर्त्यांनी त्यांना तातडीने जवळच्या खाजगी रुग्णालयात दाखल केले, मात्र उपचार सुरू होण्याआधीच डॉक्टरांनी त्यांना मृत घोषित केले.
मृत बाबासाहेब कलगुटगी हे मुरूम पुरवठ्याचा व्यवसाय करत होते. त्यांना पूर्वीपासून हृदयविकाराचा त्रास होता. मात्र बुधवारी मिरवणुकीतील कानठळ्या बसवणारा आवाज आणि प्रचंड गर्दीमुळे त्यांच्या तब्येतीवर परिणाम झाला असावा, असा डॉक्टरांचा अंदाज आहे. त्यांच्या आकस्मिक मृत्यूमुळे कुटुंबीयांचा आक्रोश सुरू झाला असून परिसरात हळहळ व्यक्त होत आहे.
दरम्यान, मिरज शहर पोलिसांनी गेल्या महिनाभरापासून मिरवणुकीत डीजेचा वापर करू नये यासाठी जनजागृती मोहीम राबवली होती. तसेच मंडळांना नियमांचे पालन करण्याचे आवाहनही केले होते. परंतु बुधवारी शहरातील अनेक मंडळांनी डीजेचा वापर करत कानठळ्या बसवणारा दणदणाट केला. या दणदणाटामुळेच एका व्यक्तीचा बळी गेल्याने नागरिकांतून तीव्र संताप व्यक्त होत आहे.
गणेश आगमनाच्या उत्साहाला बुधवारी रात्री या घटनेने काळी छाया पसरली. मिरवणुकीत सहभागी असलेले कार्यकर्ते तसेच उपस्थित नागरिक हादरले. शहरात विविध भागांत या घटनेची चर्चा रंगली असून “डीजेमुळे एका कार्यकर्त्याचा बळी गेला, तरीही मंडळे आणि प्रशासन यापुढे काय भूमिका घेणार?” असा प्रश्न उपस्थित होत आहे.
