माणदेश एक्सप्रेस न्यूज | राज्य प्रतिनिधी :
शेतकऱ्यांच्या कर्जमाफीचा मुद्दा पुन्हा एकदा चांगलाच पेटला आहे. मराठा आंदोलनाचे नेते मनोज जरांगे पाटील यांनी राज्य सरकारवर प्रखर शब्दांत हल्लाबोल करत सरकारने शेतकऱ्यांना फसवल्याचा गंभीर आरोप केला आहे. नागपूर येथे बच्चू कडू यांच्या नेतृत्वात सुरू असलेल्या शेतकरी आंदोलनात मुख्यमंत्र्यांसोबत झालेल्या बैठकीत 30 जून 2026 पर्यंत कर्जमाफीची घोषणा करण्याचे आश्वासन देण्यात आल्यानंतर राज्यातील शेतकरी संघटना आणि मराठा समाज नेत्यांकडून तीव्र प्रतिक्रिया उमटत आहेत.
मनोज जरांगे पाटीलांनी सरकारला थेट प्रश्न विचारत संताप व्यक्त केला. ते म्हणाले,
“ही शेतकऱ्यांची सरळसरळ फसवणूक आहे. 30 जून 2026 ला कर्जमाफी म्हणजे तोपर्यंत शेतकरी मेलाच ना? आजची परिस्थिती भयानक आहे. सरकार म्हणतं सहा महिन्यानंतर देऊ, पण शेतकरी तोपर्यंत कसा जगणार? सरकार सूडाच्या भावनेतून वागतं आहे. मोगलांपेक्षा हे सरकार क्रूर आहे.”
जरांगेंनी शेतकऱ्यांना इशारा देत सांगितले की आता विश्वास ठेवू नये, दंडुके हाती घ्यावेत आणि सरकारला सरसकट कर्जमाफी देण्यासाठी भाग पाडावे.
सरकारने समिती स्थापन करण्याच्या निर्णयालाही जरांगेंनी तीव्र विरोध दर्शवला.
“समितीची गरज नाही. समिती बरखास्त करा. आम्ही रस्त्यावर उतरलो तर थांबवू शकणार नाही. सरकारने निर्णय घ्यावा नाहीतर रस्त्यावर फिरू देणार नाही,” असा इशारा त्यांनी दिला.
ते देवेंद्र फडणवीस यांच्यावरही ताशेरे ओढत म्हणाले,
“फडणवीस एकदा गोड बोलतात आणि दुसरा डाव टाकतात. एकीकडे म्हणतात ओबीसीचा धक्का बसणार नाही, दुसरीकडे जीआर देतात. मग प्रमाणपत्र कधी देणार? लोकांना दिशाभूल करु नका.”
ओबीसीचा डीएनए आपल्यात असल्याचे सांगत त्यांनी ओबीसी समाजालाही संदेश दिला.
मराठा समाजाच्या आरक्षणाच्या मागणीवर पुन्हा जोर देत ते म्हणाले,
“आमचा जीआर निघाला आहे. मराठवाडा आणि पश्चिम महाराष्ट्रातील मराठे दमादमाने आरक्षणात घालणार. मराठे पेटणार नाहीत, पण आता शांतही बसणार नाहीत.”
ते म्हणाले की काही जण सोशल मीडियावर प्रमाणपत्र पोस्ट करत आहेत, तसे करू नये.
राज्यात पहिल्यांदाच शेतकरी कर्जमाफीचा प्रश्न आणि मराठा आरक्षणाचा मुद्दा एकाच वेळी तापतो आहे. मराठा समाजनेते शेतकऱ्यांच्या कर्जमाफीसाठी जोरदार भूमिका मांडताना दिसत आहेत.
सरकारने दिलेल्या मुदतीवर शेतकरी संघटनांचा अविश्वास वाढत आहे. 2026पर्यंत कर्जमाफीचा शब्द दिल्याने शेतकऱ्यांच्या जगण्याचा प्रश्न निर्माण झाल्याचे नेते बोलत आहेत.
दरम्यान, सरकारच्या आश्वासनानंतरही आंदोलन मागे घेण्याबाबत अनिश्चितता कायम आहे. बच्चू कडू आणि अन्य शेतकरी नेते सरकारकडून स्पष्ट आणि तत्काळ निर्णयाची मागणी करीत आहेत.
राज्याच्या राजकारणात शेतकरी आणि मराठा हे दोन जाज्वल्य मुद्दे आता एकत्र येत आहेत. येत्या काही दिवसांत राज्य सरकारवर दबाव आणण्यासाठी आंदोलने अधिक उग्र होण्याची शक्यता नाकारता येत नाही.
“30 जून 2026 ला कर्जमाफी? शेतकरी मेल्यावर कर्जमाफी कशाला!” — मनोज जरांगेचा संताप
शेतकऱ्यांना भरोसा नाही! जरांगेंचा सरकारवर हल्लाबोल—“दंडुके घ्या हाती!”
शेतकरी विरुद्ध सरकार युद्ध पेटणार? जरांगेंचे सरकारला अल्टिमेटम
फडणवीसांवर थेट टीका: “गोड बोलून दुसरा डाव टाकतात” — जरांगे
