माणदेश एक्सप्रेस न्यूज | बीड :
मराठा समाजासाठी दीड वर्षाहून अधिक काळ रस्त्यावर लढा देणारे नेते मनोज जरांगे पाटील यांनी आज दसऱ्याच्या शुभमुहूर्तावर बीड जिल्ह्यातील नारायण गडावर भव्य दसरा मेळावा आयोजित केला होता. या मेळाव्याला हजारो मराठा बांधवांनी गर्दी करून आपल्या नेत्याला साथ दिली.
आरक्षणाच्या लढ्याने थकलेले, आजारी पडलेले तरीही समाजासाठी झगडण्याची जिद्द अजूनही कमी झाली नसल्याचे चित्र या मेळाव्यात दिसले. जरांगे यांनी प्रकृती बरी नसतानाही खुर्चीवर बसूनच जनतेला संबोधित केले. त्यांच्या आवाजात कातरता होती, कंठ दाटला होता, आणि डोळ्यांत पाणी होते. भाषणाच्या एका टप्प्यावर ते ढसाढसा रडले.
भाषणात जरांगे यांनी मराठा बांधवांना थेट दोन कानमंत्र दिले.
“मराठा समाजाने आता फक्त आंदोलन, मोर्चे यावर थांबता कामा नये. आपल्या मुलांनी शासक व्हावं, प्रशासक व्हावं, निर्णय घेणाऱ्या खुर्चीत बसलं पाहिजे.”
“आपण प्रशासनात गेलो, तर भल्याभल्यांना आल्यासमोर झुकावं लागेल. तेव्हाच आपल्या लढ्याला खरी ताकद मिळेल.”
जरांगे यांनी आपल्या भाषणात भावनिक सूर लावत काहींवर विश्वासघाताचा आरोपही केला.
“या लढ्यात काही जणांनी फितुरी केली, त्यामुळे लढा कमकुवत झाला. पण मी हार मानणार नाही. मराठा समाजाचा प्रश्न सुटला नाही तर मी थांबणार नाही.” असे ते म्हणाले.
गेल्या दीड वर्षात जरांगे यांनी मराठा आरक्षणासाठी अनेक उपोषणं, आंदोलनं, पायी मोर्चे काढले. त्यांच्या नेतृत्वाखाली मराठा समाजाने पुन्हा एकदा आरक्षणाचा मुद्दा जिवंत ठेवला आहे. शासनाने अनेकदा आश्वासनं दिली पण ठोस निकाल आजतागायत लागलेला नाही.
जरांगे यांच्या भावुक भाषणादरम्यान सभागृहात शांतता पसरली. अनेक कार्यकर्त्यांच्या डोळ्यांत पाणी आले. “मराठा आरक्षण मिळालंच पाहिजे” अशा घोषणा गुंजत राहिल्या.
दसऱ्याच्या दिवशी झालेला हा मेळावा मराठा आंदोलनाच्या पुढच्या टप्प्याची दिशा ठरवणारा ठरला. जरांगे यांनी दिलेला ‘शासक-प्रशासक व्हा’ हा संदेश आणि फितुरीवरचा आरोप आता समाजात नवा ऊर्जावाहक ठरण्याची शक्यता आहे.
