माणदेश एक्सप्रेस न्यूज नेटवर्क │ मुंबई
महाराष्ट्रात आगामी विधानसभा आणि स्थानिक स्वराज्य निवडणुकीच्या पार्श्वभूमीवर सत्ताधारी महायुतीमध्ये धुसफूस चव्हाट्यावर आली आहे. भारतीय जनता पक्ष, शिवसेना (शिंदे गट) आणि राष्ट्रवादी काँग्रेस (अजित पवार गट) या तिन्ही घटकांमध्ये जागावाटप आणि स्थानिक वर्चस्वाच्या प्रश्नावरून उघडपणे संघर्ष सुरू झाला आहे.
गडचिरोली, कल्याण, बदलापूर आणि जळगाव या ठिकाणी गेल्या काही दिवसांत उफाळलेल्या घटनांनी महायुतीच्या एकजुटीवर प्रश्नचिन्ह निर्माण केले आहे.
गडचिरोलीत राष्ट्रवादी काँग्रेस (अजित पवार गट)चे ज्येष्ठ नेते व माजी मंत्री धर्मराव बाबा अत्राम यांनी भाजपवर थेट गंभीर आरोप केला आहे.
अत्राम म्हणाले, “भाजपने माझ्या विरोधात माझ्याच पुतण्याला ५ कोटी रुपये देऊन निवडणुकीत उतरवलं. अशा पद्धतीनं मित्रपक्षांच्या नेत्यांना संपवण्याचा प्रयत्न सुरू आहे.”
त्यांनी पुढे स्पष्ट केलं की, “आम्ही १९ जागांवर स्वबळावर लढण्याचा निर्णय घेतला आहे. आमचा स्वाभिमान विकत घेता येणार नाही.”
या वक्तव्यामुळे महायुतीतील अजित पवार गट आणि भाजप यांच्यातील तणाव स्पष्टपणे पृष्ठभागावर आला आहे.
दरम्यान, ठाणे जिल्ह्यातील कल्याणमध्ये शिंदे गटाचे जिल्हाप्रमुख यांनी भाजपकडे थेट इशारा देत म्हटलं की, “भाजपने जर युती केली नाही, तर आम्ही त्यांना आडवे करून मैदानात उतरू.”
या वक्तव्याने शिंदे गटातील असंतोष उघड झाला आहे.
बदलापूरमध्येही भाजप आणि अजित पवार गटाने स्वतंत्रपणे युती जाहीर केली, मात्र शिंदे गटाला बाजूला ठेवण्यात आलं. त्यामुळे शिवसेनेच्या कार्यकर्त्यांमध्ये नाराजीचे वातावरण आहे.
जळगाव जिल्ह्यात अजित पवार गटाचे मंत्री अनिल पाटील यांनी म्हटलं की, “जर महायुती झाली नाही, तर आम्ही आमची ताकद दाखवू.”
त्यांच्या या वक्तव्याने अजित पवार गटातील नेतेदेखील स्वतंत्र लढाईच्या तयारीत असल्याचं संकेत दिले आहेत.
महायुतीतील प्रमुख नेते मुख्यमंत्र्यांपासून ते उपमुख्यमंत्र्यांपर्यंत “विकासासाठी एकत्र आलो” असं सांगत असले तरी, स्थानिक पातळीवर मात्र परिस्थिती उलट आहे.
प्रत्येक ठिकाणी कार्यकर्त्यांमध्ये “आपला उमेदवार – आपली ताकद” या विचारावरून गटबाजी, तणाव आणि गोंधळ वाढला आहे.
राजकीय विश्लेषकांच्या मते,
“महायुतीचं तत्त्वज्ञान सत्तेसाठी आहे, पण स्थानिक स्वार्थ आणि वर्चस्वासाठी लढणारे कार्यकर्ते युतीचं गणित विस्कटवत आहेत. ही धुसफूस थांबली नाही, तर निवडणुकीआधीच युतीच्या एकतेचा फुगा फुटू शकतो.”
महायुतीतील या अंतर्गत कलहामुळे विरोधकांच्या गोटात आनंदाचं वातावरण आहे. काँग्रेस आणि शरद पवार गटाने आधीच टोले लगावले आहेत.
काँग्रेसचे एक नेते म्हणाले, “महायुती ही तात्पुरती सोय आहे, विचारसरणी नाही. आता ते उघडपणे दिसू लागलं आहे.”
सत्ताधारी महायुतीची एकता आता गंभीर कसोटीवर आली आहे.
गडचिरोलीपासून जळगावपर्यंत सुरू असलेल्या असंतोषामुळे भाजपला दोन्ही मित्रपक्षांना समजावून घ्यावं लागेल.
पुढील काही दिवसांत या धुसफुसीचं ‘वादळात रूपांतर’ होतं का, की महायुती नेतृत्व परिस्थिती सावरतं – हे पाहणं उत्सुकतेचं ठरणार आहे.
