माणदेश एक्सप्रेस न्यूज |मुंबई :
महाराष्ट्रातील पात्र आणि गरजू शेतकऱ्यांना लवकरच कर्जमाफीचा लाभ मिळणार असल्याची माहिती महसूलमंत्री चंद्रशेखर बावनकुळे यांनी दिली. भाजपाने निवडणुकीत दिलेले आश्वासन पाळून सरकार ही योजना अंमलात आणणार असल्याचे त्यांनी स्पष्ट केले.
बावनकुळे म्हणाले, “योग्य शेतकऱ्यांना कर्जमाफी देण्यावर सरकारचा भर आहे. यासाठी विशेष समिती नेमण्यात आली असून, ही समिती राज्यभरातील शेतकऱ्यांचे सर्वेक्षण करणार आहे. त्यानंतर पात्र आणि खऱ्या अर्थाने मदतीची गरज असणाऱ्या शेतकऱ्यांची यादी तयार केली जाईल. कर्जमाफी ही मेरिटवर होईल. समाजातील सर्वात शेवटच्या घटकाला मदत पोहोचवणे हे सरकारचे उद्दिष्ट आहे. समितीचा अहवाल आल्यानंतर अंतिम निर्णय घेतला जाईल.”
गुंठेवारीतील घरमालकांना दिलासा
महसूलमंत्र्यांनी गुंठेवारीतील अडचणींवरही भाष्य केले. “तुकडेबंदी कायद्यामुळे ज्या मिळकतींची नोंदणी होत नाही, अशा घरमालकांना दिलासा देण्यासाठी सरकार प्रयत्नशील आहे. छत्रपती संभाजीनगर आयुक्तांना २०११ पूर्वीच्या गुंठेवारीतील बांधकामांची यादी तयार करण्याचे निर्देश दिले आहेत. जास्त आकारणी कमी करून सर्वसामान्यांना दिलासा देण्याचा विचार आहे,” असे त्यांनी सांगितले.
महसूल विभागातील इतर उपक्रम
बावनकुळे यांनी महसूल विभागाच्या सुरू असलेल्या कामांची माहिती देताना सांगितले की –
महसूल विभागातील अनेक जागांवरील अतिक्रमणे काढण्याचे काम सुरू आहे.
वर्ग-२ जमिनी वर्ग-१ मध्ये रूपांतरित करण्याची प्रक्रिया गतीमान झाली आहे.
पाणंद रस्त्यांवरील अतिक्रमणांवर कारवाई सुरू आहे.
शैक्षणिक दाखल्यांसाठी लागणाऱ्या ५०० रुपयांच्या स्टॅम्प पेपरची अट रद्द करण्यात आली आहे.
घर बांधण्यासाठी लागणाऱ्या मुरमावर रॉयल्टी आकारली जाणार नाही.
सिंधी समाजाला जागा उपलब्ध करून देण्यात आली आहे.
राजकीय घडामोडींवर भाष्य
उपमुख्यमंत्री एकनाथ शिंदे यांच्या दिल्ली भेटीवर भाष्य करताना बावनकुळे म्हणाले, “एनडीएचे नेते म्हणून एकमेकांना भेटणे आवश्यक असते. अनेक राजकीय विषयांवर समन्वय साधण्यासाठी अशा भेटी होतात. त्यामध्ये वेगळे काही नाही. शिंदे आणि देवेंद्र फडणवीस यांच्या भेटीदेखील याच स्वरूपाच्या असतात.”
ही घोषणा शेतकऱ्यांसाठी आशेचा किरण ठरणारी आहे, मात्र समितीचा अहवाल आणि त्यानंतरची अंमलबजावणी हा पुढील टप्पा ठरणार आहे.
