माणदेश एक्सप्रेस न्यूज | मुंबई
महाराष्ट्रातील महिलांसाठी सुरू करण्यात आलेली मुख्यमंत्री माझी लाडकी बहीण योजना (Mukhyamantri Majhi Ladki Bahin Yojana) ही सध्या राज्यभर चर्चेत आहे. महायुती सरकारची ही महत्वाकांक्षी योजना जुलै 2024 मध्ये सुरू झाली. या योजनेअंतर्गत पात्र महिलांना दरमहा 1500 रुपयांची आर्थिक मदत दिली जाते. सध्या राज्यभरातील तब्बल 2 कोटींपेक्षा अधिक महिला या योजनेचा लाभ घेत आहेत. मात्र आता या योजनेसंदर्भात एक अत्यंत महत्वाची आणि सर्व लाभार्थ्यांसाठी आवश्यक अशी माहिती समोर आली आहे.
सरकारकडून आता e-KYC प्रक्रिया पूर्ण करणे अनिवार्य करण्यात आले आहे. महिलांनी ही प्रक्रिया वेळेत पूर्ण न केल्यास त्यांच्या खात्यातील 1500 रुपयांचा हप्ता थांबू शकतो, असा इशारा देण्यात आला आहे.
महिला व बालविकास मंत्री आदिती तटकरे यांनी X (माजी ट्विटर) या सोशल मीडिया प्लॅटफॉर्मवर या संदर्भात महत्त्वाचे ट्विट केले आहे. त्यांनी सांगितले की,
“मुख्यमंत्री माझी लाडकी बहीण योजनेमध्ये पारदर्शकता यावी आणि लाभार्थ्यांना नियमितपणे आर्थिक लाभ मिळावा, यासाठी e-KYC प्रक्रिया सुरू करण्यात आली आहे. दिनांक 18 सप्टेंबर 2025 पासून अधिकृत संकेतस्थळावर ही सुविधा उपलब्ध झाली आहे. बहुतेक लाभार्थ्यांनी ही प्रक्रिया पूर्ण केली असली तरी उर्वरित महिलांनी 18 नोव्हेंबर 2025 पूर्वी e-KYC प्रक्रिया पूर्ण करणे आवश्यक आहे.”
त्यामुळे सर्व पात्र लाभार्थ्यांना केवळ काहीच दिवसांचा अवधी शिल्लक आहे. या अंतिम तारखेच्या आत e-KYC न केल्यास पुढील महिन्यापासून 1500 रुपयांचा लाभ तात्पुरता बंद होऊ शकतो.
ई-केवायसी म्हणजे लाभार्थी महिलांची ओळख आधार क्रमांकाशी जोडून त्यांची पात्रता आणि नोंदणीची पडताळणी करणे. हे एकप्रकारे डिजिटल ओळख पडताळणीचे साधन आहे. या प्रक्रियेच्या माध्यमातून सरकारला लाभार्थ्यांची माहिती अचूक मिळेल आणि गैरप्रकार टाळले जातील.
महिला लाभार्थ्यांनी पुढील पद्धतीने ई-केवायसी प्रक्रिया पूर्ण करावी :
1️⃣ सर्वप्रथम https://ladakibahin.maharashtra.gov.in या अधिकृत संकेतस्थळाला भेट द्या.
2️⃣ लॉगिन केल्यानंतर “e-KYC” या पर्यायावर क्लिक करा.
3️⃣ तुमचा आधार क्रमांक (Aadhaar Number) प्रविष्ट करा.
4️⃣ त्यानंतर कॅप्चा कोड (Captcha Code) टाका आणि “Send OTP” वर क्लिक करा.
5️⃣ आधारशी जोडलेल्या मोबाईलवर आलेला OTP नोंदवा आणि “Submit” करा.
6️⃣ पुढील टप्प्यात आपला जात प्रवर्ग (Caste Category) निवडा.
7️⃣ खालील दोन मुद्द्यांबाबत डिक्लेरेशन (Declaration) पूर्ण करा :
कुटुंबातील कोणताही सदस्य शासकीय सेवेत कार्यरत नाही किंवा निवृत्तीनंतर पेन्शन घेत नाही.
कुटुंबातील केवळ १ विवाहित आणि १ अविवाहित महिला या योजनेचा लाभ घेत आहे.
8️⃣ चेक बॉक्सवर क्लिक करून “Submit” बटण दाबा.
9️⃣ शेवटी “Success – तुमची e-KYC पडताळणी यशस्वीरित्या पूर्ण झाली आहे” असा संदेश दिसेल.
📅 अंतिम तारीख : 18 नोव्हेंबर 2025
या तारखेनंतर e-KYC प्रक्रिया पूर्ण न केल्यास लाभार्थींचे पैसे तात्पुरते थांबवले जाऊ शकतात.
या योजनेत सुरुवातीपासूनच मोठ्या प्रमाणात नोंदणी झाली होती. पण त्याचबरोबर काही गैरव्यवहार आणि अपात्र लाभार्थ्यांचे प्रकारही समोर आले. त्यामुळे सरकारने e-KYC प्रक्रिया सुरू करून योजनेतील पारदर्शकता आणि जबाबदारी वाढवण्याचा निर्णय घेतला आहे.
‘मुख्यमंत्री माझी लाडकी बहीण योजना’ ही राज्यातील महिलांसाठी आर्थिक सक्षमीकरणाचे एक मोठे पाऊल आहे. मात्र या योजनेचा लाभ अखंडपणे मिळत राहावा यासाठी सर्व पात्र लाभार्थी महिलांनी 18 नोव्हेंबरपूर्वी e-KYC प्रक्रिया पूर्ण करणे अत्यावश्यक आहे. सरकारकडूनही या संदर्भात विविध जिल्हास्तरीय कार्यालयांना सूचना देण्यात आल्या आहेत.
