माणदेश एक्स्प्रेस न्यूज | कल्याण :
आजच्या यांत्रिक आणि स्वार्थी जगात, माणुसकी आणि प्रामाणिकपणाचे उदाहरण विरळाच पाहायला मिळते. पण कल्याण-डोंबिवली महानगरपालिका (KDMC) क्षेत्रातील सफाई कर्मचाऱ्यांनी दाखवलेला प्रामाणिकपणा आणि माणुसकी आज संपूर्ण शहरात चर्चेचा विषय ठरला आहे. या कर्मचाऱ्यांनी सिद्ध केलं की, सोन्यापेक्षा अधिक मौल्यवान जर काही असेल, तर तो म्हणजे “माणुसकीचा सुवास आणि प्रामाणिकतेचा तेज”!
कल्याण पूर्वेतील रहिवासी असलेल्या एका महिलेकडून चुकून तिचा महागडा सोन्याचा हार घरातील कचऱ्यात टाकला गेला. रोजच्या प्रमाणे सुमित कंपनीच्या सफाई गाडीने तो कचरा गोळा करून पुढे नेला. काही वेळानंतर त्या महिलेने आपली चूक ओळखली, आणि तिच्या पायाखालची जमीनच सरकली! कारण कचरा गाडी आधीच निघून गेली होती.
तिने तातडीने केडीएमसी कार्यालयाशी संपर्क साधला. तिच्या तक्रारीनंतर केडीएमसीचे स्वच्छता निरीक्षक अमित भालेराव आणि सुमित कंपनीचे अधिकारी समीर खाडे यांनी विलंब न लावता तातडीने शोधमोहीम सुरू केली.
महिलेची माहिती मिळाल्यानंतर संबंधित प्रभागातील कचरा गाडीला लगेचच कचोरे टेकडीवरील इंटरकटींग केंद्रावर थांबविण्यात आले. महिलेचे कुटुंबीय, शेजारी आणि कंपनीचे अधिकारी यांच्या उपस्थितीत त्या गाडीतील कचरा काळजीपूर्वक वेगळा करण्यात आला.
संपूर्ण ढिगारा एकेक करून चाळण्यात आला आणि अखेर कर्मचाऱ्यांच्या मेहनतीला यश आलं — कचऱ्याच्या ढिगाऱ्यातून तो सोन्याचा हार अखेर सापडला!
कचऱ्यातून हार सापडल्यावरही या कर्मचाऱ्यांनी कोणताही मोह न ठेवता तो हार तात्काळ त्या महिलेच्या स्वाधीन केला.
महिलेच्या चेहऱ्यावरचा आनंद आणि डोळ्यांतील पाणी सांगत होतं — “अजूनही या जगात माणुसकी जिवंत आहे.”
त्या महिलेने आणि तिच्या कुटुंबाने कर्मचाऱ्यांचे आभार मानताना त्यांचे हात जोडले. उपस्थित अधिकारी, शेजारी आणि नागरिकांनी या कर्मचाऱ्यांचा प्रामाणिकपणासाठी मनःपूर्वक सन्मान केला.
या घटनेनंतर कल्याणमध्ये या कर्मचाऱ्यांचे कौतुक सर्वत्र होत आहे.
सामाजिक माध्यमांवरून अनेकांनी प्रतिक्रिया देत म्हटलं —
“आजच्या काळात जिथे सोन्याच्या मोहात माणूस आपली माणुसकी विसरतो,
तिथे या कर्मचाऱ्यांनी दाखवलेला प्रामाणिकपणा म्हणजे एक जिवंत आदर्श आहे.”
केडीएमसी आणि सुमित कंपनीचे हे सफाई कर्मचारी फक्त शहर स्वच्छ ठेवत नाहीत, तर समाजात माणुसकी आणि प्रामाणिकतेचा सुवास पसरवत आहेत.
त्यांच्या या कृतीने ‘सफाई कामगार’ हा शब्द अधिक अभिमानाने उच्चारला जात आहे.
जगात सोनं, पैसा, कीर्ती या गोष्टी महत्त्वाच्या असल्या तरी त्यांच्यापेक्षा मोठं काही असेल, तर ते म्हणजे माणुसकी आणि प्रामाणिकपणा.
कल्याणमधील या घटनेने पुन्हा एकदा सिद्ध केलं की —
“सोनं हरवलं तर पुन्हा मिळू शकतं,
पण माणुसकी हरवली, तर जगणंच हरवतं.”
