माणदेश एक्सप्रेस न्युज
सांगली : जिल्हा कौशल्य विकास, रोजगार व उद्योजकता मार्गदर्शन केंद्र, सांगली व मिरज महाविद्यालय, मिरज यांच्या संयुक्त विद्यमाने “पंडित दीनदयाळ उपाध्याय रोजगार मेळावा” शुक्रवार, दिनांक 21 मार्च 2025 रोजी सकाळी 10 वाजता, मिरज महाविद्यालय मिरज (गुलाबराव पाटील संकुल शेजारी शासकीय दुध डेअरी जवळ, मिरज) येथे आयोजित करण्यात आला आहे. या मेळाव्याचा जिल्ह्यातील जास्तीत जास्त सुशिक्षित बेरोजगार उमेदवारांनी लाभ घ्यावा, असे आवाहन जिल्हा कौशल्य विकास, रोजगार व उद्योजकता मार्गदर्शन केंद्राचे सहायक आयुक्त जमीर करीम यांनी प्रसिध्दीपत्रकाव्दारे केले आहे.
या मेळाव्यात 300 पेक्षा अधिक पदाकरीता जिल्ह्यातील नामांकित अशा 10 पेक्षा जास्त कंपन्यांचा व स्वयंरोजगारासाठी कर्ज योजनांची माहिती देण्यासाठी जिल्ह्यातील सर्व महामंडळे यांचा सहभाग असणार आहे. दहावी, बारावी, आय. टी. आय, डिप्लोमा, ग्रॅज्युएट, पोस्ट ग्रॅज्युएट या प्रकारची शैक्षणिक पात्रता असणाऱ्या आणि सुशिक्षित बेरोजगार उमेदवारांसाठी विविध पदांकरिता, मेळाव्यामध्ये उपस्थित उद्योजकांकडे प्रत्यक्ष मुलाखती घेण्यात येणार आहेत.
इच्छुक उमेदवारांनी https://rojgar.mahaswayam.gov.in या वेबसाईटद्वारे आपला ऑनलाईन सहभाग नोंदवावा. शुक्रवार, दिनांक 21 मार्च रोजी प्रत्यक्ष मुलाखतीस येताना, आपली सर्व मूळ कागदपत्रे, पासपोर्ट साईज फोटो आणि बायोडाटाच्या किमान तीन छायांकित प्रती सोबत घेऊन याव्यात. रोजगार मेळाव्याच्या अधिक माहितीसाठी, जिल्हा कौशल्य विकास, रोजगार व उद्योजकता मार्गदर्शन केंद्र, मध्यवर्ती प्रशासकीय इमारत, तळमजला, विजयनगर, सांगली (दूरध्वनी क्रमांक 0233-2990383) या कार्यालयाशी संपर्क साधावा, असे श्री. करीम यांनी प्रसिध्दीपत्रकाव्दारे कळविले आहे.
