माणदेश एक्सप्रेस न्यूज | जळगाव :
महाराष्ट्रात गेल्या काही दिवसांपासून माणुसकीला काळिमा फासणाऱ्या घटना सातत्याने समोर येत आहेत. अशीच एक संतापजनक घटना जळगाव जिल्ह्यातील चोपडा तालुक्यात घडली आहे. शालेय पासची मुदत संपल्याचे कारण देत एका पाचवीतील आदिवासी विद्यार्थ्याला बस कंडक्टरने भर पावसात रस्त्यात उतरवले. या प्रकारामुळे मुलाला दोन ते तीन किलोमीटर पायी चालत आपल्या पाड्यावर परत जावे लागले. लहान मुलांवर झालेल्या या अमानुष वागणुकीमुळे सर्वत्र संताप व्यक्त होत आहे.
चोपडा तालुक्यातील उनपदेव आणि अडावद गावांदरम्यान हा प्रकार घडला. बादल राजाराम बारेला असे पीडित विद्यार्थ्याचे नाव असून तो पाचवीत शिकतो. रोजच्या प्रमाणे तो एसटी बसने प्रवास करत होता. त्यावेळी बस कंडक्टरने तिकिट व पास दाखवण्यास सांगितले. बादलने त्याचा पास दाखवला; मात्र पासची मुदत संपल्याचे दिसताच कंडक्टरने कोणतीही दया न दाखवता त्याला बसमधून खाली उतरवले.
त्या वेळी मुसळधार पाऊस सुरू होता. लहान मुलाला रस्त्यात उतरवून बस निघून गेल्यानंतर बादलला सुमारे २-३ किलोमीटरचा प्रवास पावसात चालत करावा लागला. हा प्रकार बघून स्थानिकांमध्ये प्रचंड संताप उसळला आहे.
घटनेची माहिती मिळाल्यानंतर कर्जाणे गावाचे उपसरपंच प्रमोद बारेला आणि बिरसा ब्रिगेड सातपुडाचे अध्यक्ष रामदास पावरा यांनी तातडीने पुढाकार घेतला. त्यांनी चोपडा आगार व्यवस्थापक महेंद्र पाटील यांना निवेदन देऊन या घटनेची सखोल चौकशी करण्याची मागणी केली.
“कर्तव्य महत्त्वाचे आहे, पण माणुसकी त्याहूनही महत्त्वाची आहे. एका लहानग्या विद्यार्थ्याला भर पावसात एकटं सोडून देणे हे अमानुष आहे. दोषी वाहकावर कठोर कारवाई करावी,” अशी ठाम भूमिका स्थानिकांनी मांडली आहे.
या प्रकरणाबाबत बोलताना चोपडा आगारप्रमुख महेंद्र पाटील यांनी सांगितले की, “या वाहकाविरुद्ध तक्रार दाखल करून विभागीय कार्यालयात पाठवण्यात आली आहे. घटनेची चौकशी करून दोषीवर आवश्यक ती कडक कारवाई केली जाईल.”
एसटी महामंडळ जनतेच्या सेवेसाठी कार्यरत असले तरी अशा प्रकारच्या घटना होत असल्याने महामंडळाच्या प्रतिमेला धक्का बसत आहे.
शालेय मुलांच्या सुरक्षेबाबत एसटी महामंडळ किती जबाबदार आहे?
एका छोट्या चुकीमुळे विद्यार्थ्याचे प्राण धोक्यात आले असते तर जबाबदार कोण?
भविष्यात अशा घटना टाळण्यासाठी ठोस पावले कधी उचलली जातील?
स्थानिक नागरिकांकडून या घटनेबाबत निषेध नोंदवण्यात येत असून, तातडीने न्याय मिळावा यासाठी आवाज उठवला जात आहे.
