माणदेश एक्सप्रेस न्यूज :- आजच्या धावपळीच्या जीवनशैलीत आरोग्याकडे लक्ष ठेवणे अत्यंत महत्त्वाचे झाले आहे. शरीर फिट ठेवण्यासाठी आणि वजन कमी करण्यासाठी बहुतेक लोक ग्रीन टीकडे वळले आहेत. ग्रीन टीचे अनेक फायदे मान्य असले, तरी त्याचे दुष्परिणामदेखील कमी नाहीत. आरोग्यतज्ज्ञांच्या मते ग्रीन टी प्रत्येकासाठी योग्य नसते. उलट काही लोकांमध्ये ते गंभीर त्रासही निर्माण करू शकते. त्यामुळे ग्रीन टी पिण्यापूर्वी त्याचे फायदे-तोटे जाणून घेणे गरजेचे आहे.
ग्रीन टीमध्ये असलेल्या कॅफिन आणि टॅनिन हे घटक जास्त प्रमाणात शरीरात गेले तर ते अनेक त्रासांना कारणीभूत ठरतात. तज्ज्ञांच्या मते, अति प्रमाणात ग्रीन टी पिणे खालील समस्या निर्माण करू शकते –
डोकेदुखी व मायग्रेन
चिंता आणि अस्वस्थता
निद्रानाश किंवा कमी झोप येणे
मळमळ
जलद किंवा अनियमित हृदयाचे ठोके
छातीत जळजळ आणि आम्लपित्त
चक्कर येणे किंवा सौम्य डोकेदुखी
रिकाम्या पोटी ग्रीन टी पिल्यास टॅनिनमुळे पोटात आम्लाचे प्रमाण वाढते. यामुळे पोटफुगी, बद्धकोष्ठता, आम्ल रिफ्लक्स किंवा अगदी अल्सर होऊ शकतो. ज्यांना गॅस्ट्र्रिटिस, पेप्टिक अल्सर किंवा संवेदनशील पचनाची समस्या आहे, त्यांनी ग्रीन टी जेवणानंतरच घ्यावी.
जास्त कॅफिनमुळे शरीरात कॅल्शियम शोषण कमी होते. यामुळे दीर्घकाळात हाडे कमकुवत होऊ शकतात. नैसर्गिकरित्या कॅफिनसाठी संवेदनशील असलेल्या व्यक्तींनी ग्रीन टीचे सेवन मर्यादित प्रमाणात करणे आवश्यक आहे.
मुलांना ग्रीन टी देणे टाळावे. त्यातील कॅफिन आणि टॅनिनमुळे त्यांच्या मज्जासंस्थेवर विपरीत परिणाम होतो. तसेच हे घटक प्रथिने आणि चरबी यांसारख्या मुलांच्या वाढीसाठी आवश्यक पोषकतत्वांचे शोषण रोखतात.
ग्रीन टी शरीरातील नॉन-हीम आयर्न (फळे, भाज्या, शेंगा इ.) शोषण्याची क्षमता कमी करते. त्यामुळे ज्यांना आधीपासूनच अशक्तपणा (ऍनिमिया) आहे त्यांच्यामध्ये थकवा अधिक वाढू शकतो.
ग्रीन टीमधील कॅफिनमुळे गर्भपाताचा धोका वाढू शकतो. तसेच बाळाच्या वाढीवरही त्याचा वाईट परिणाम होतो. याशिवाय ग्रीन टीमधील कॅटेचिन हे घटक फॉलिक अॅसिड शोषण्यास अडथळा आणतात. त्यामुळे तज्ज्ञांच्या मते गर्भवती किंवा स्तनपान करणाऱ्या महिलांनी दिवसातून दोन कपांपेक्षा जास्त ग्रीन टी पिऊ नये.
