माणदेश एक्सप्रेस न्युज | उत्तर प्रदेश :
उत्तर प्रदेशातील ग्रेटर नोएडा शहरात रविवारी उशिरा रात्री घडलेल्या भीषण अपघातात तीन तरुण विद्यार्थ्यांचा मृत्यू झाल्याने हळहळ व्यक्त होत आहे. यमुना एक्सप्रेसवेच्या चुहारपूर अंडरपासजवळ पाण्याच्या टँकर आणि दुचाकीची जोरदार धडक झाली. या धडकेत गौतम बुद्ध विद्यापीठात शिक्षण घेणाऱ्या तिन्ही विद्यार्थ्यांचा मृत्यू झाला.
बीटा-२ पोलीस ठाण्याच्या हद्दीत रविवारी रात्री ही दुर्घटना घडली. पोलिसांनी दिलेल्या माहितीनुसार, मृत तिन्ही विद्यार्थी जेवण खरेदी करण्यासाठी दुचाकीवरून पूर्वांचल सोसायटीजवळील एका ढाब्याकडे निघाले होते. मात्र, वाटेत झाडांना पाणी घालण्यासाठी वापरल्या जाणाऱ्या पाण्याच्या टँकरला त्यांची दुचाकी जबर धडकली. धडक इतकी भीषण होती की दुचाकीचा चेंदामेंदा झाला आणि विद्यार्थी गंभीर जखमी झाले.
अपघातानंतर स्थानिकांनी तातडीने तिन्ही विद्यार्थ्यांना जवळच्या खासगी रुग्णालयात दाखल केले. मात्र, तेथील डॉक्टरांनी त्यापैकी दोन विद्यार्थ्यांना मृत घोषित केले. तर तिसऱ्या विद्यार्थ्याला गंभीर अवस्थेत मोठ्या रुग्णालयात हलवण्यात आले. परंतु उपचारादरम्यान त्याचाही दुर्दैवी मृत्यू झाला.
या अपघातात प्राण गमावलेले विद्यार्थी हे गौतम बुद्ध विद्यापीठात शिकत होते. मृतांमध्ये स्वयं सागर (वय १९), कुश उपाध्याय (वय २१) आणि समर्थ पुंडीर (वय १८) या तिघांचा समावेश आहे. अचानक झालेल्या या अपघाताने विद्यापीठ परिसरात आणि त्यांच्या कुटुंबीयांमध्ये शोककळा पसरली आहे.
या अपघातानंतर पोलीस घटनास्थळी दाखल झाले असून पुढील तपास सुरू आहे. टँकर चालकाची चौकशी केली जात असून, नेमका अपघात कसा घडला याचा तपास पोलीस करत आहेत. दरम्यान, या घटनेमुळे विद्यार्थ्यांच्या सुरक्षेचा प्रश्न पुन्हा ऐरणीवर आला आहे. रात्रीच्या वेळी रस्त्यावर टँकर किंवा मोठी वाहने बेदरकारपणे फिरणे हे गंभीर अपघातांना कारणीभूत ठरत असल्याची स्थानिकांची नाराजी व्यक्त केली आहे.
ही घटना केवळ तीन तरुणांचे आयुष्य हिरावून घेणारी नाही, तर प्रशासनाने वाहतुकीबाबत अधिक खबरदारी घेण्याची गरज अधोरेखित करणारी आहे.
