माणदेश एक्सप्रेस न्यूज | मुंबई
येत्या गणेशोत्सवाच्या पार्श्वभूमीवर मुंबईतील सार्वजनिक गणेशोत्सव मंडळांसाठी एक मोठा दिलासा देणारा निर्णय महापालिकेकडून घेण्यात आला आहे. मंडप उभारणीसाठी रस्त्यावर खोदकाम केल्यास आकारण्यात येणारा १५,००० रुपयांचा दंड रद्द करण्यात आला असून, तो पुन्हा पूर्ववत २,००० रुपयांवर आणण्यात आला आहे. उपमुख्यमंत्री एकनाथ शिंदे यांच्या तातडीच्या हस्तक्षेपामुळे हा निर्णय घेण्यात आला आहे.
विवादाचा उगम आणि मंडळांची नाराजी
२०१७ पासून मुंबई महापालिकेकडून गणेशोत्सवाच्या काळात मंडप उभारणीसाठी रस्ते खोदल्यास २,००० रुपयांचा ‘रस्ता पुनर्स्थापना शुल्क’ आकारण्यात येत होता. मात्र यंदाच्या नव्या नियमावलीनुसार हा दंड थेट १५,००० रुपयांवर नेण्यात आला होता. ही दरवाढ अचानक जाहीर झाल्याने मुंबईतील अनेक लहान-मोठ्या मंडळांमध्ये तीव्र संताप व्यक्त करण्यात येत होता. अनेक मंडळांनी हा खर्च परवडणारा नसल्याचे सांगत शासनाकडे यासंदर्भात हस्तक्षेपाची मागणी केली होती.
एकनाथ शिंदेंचा तातडीचा हस्तक्षेप
गणेशभक्तांची ही नाराजी उपमुख्यमंत्री एकनाथ शिंदे यांच्यापर्यंत पोहोचताच, त्यांनी गुरुवारी सकाळी मुंबई महानगरपालिका आयुक्त भूषण गगराणी यांच्याशी चर्चा केली. या चर्चेनंतर महत्त्वपूर्ण निर्णय घेण्यात आला. शिंदेंनी दिलेल्या निर्देशानुसार, महापालिकेने दंडाची वाढ रद्द करून ती पुन्हा २,००० रुपयांवर आणली आहे. हा निर्णय जाहीर होताच मंडळांमध्ये जल्लोषाचे वातावरण निर्माण झाले आहे.
नवीन तंत्रज्ञान वापरण्याचे आवाहन
यासोबतच उपमुख्यमंत्री शिंदे यांनी मंडळांना एक सकारात्मक सूचना दिली आहे. त्यांनी सांगितले की, सध्या मुंबईत रस्त्यांचे काँक्रीटीकरण मोठ्या प्रमाणावर सुरू आहे. त्यामुळे मंडप उभारणीसाठी शक्यतो रस्ते न खोदता, पर्यायी व नव्या तंत्रज्ञानाचा वापर करण्यात यावा. यामुळे सार्वजनिक मालमत्तेचे नुकसान टाळता येईल आणि रस्त्यांची गुणवत्ता टिकवून ठेवता येईल.
राजकीय संवेदनशीलतेचे दर्शन
एकनाथ शिंदे यांनी गणेशभक्तांच्या भावना लक्षात घेऊन केलेला तातडीचा निर्णय हा महायुती सरकारच्या कार्यपद्धतीचे उदाहरण मानला जात आहे. लहान-मोठ्या मंडळांसाठी हा आर्थिक दिलासा मोठा आहे. यामुळे यंदाचा गणेशोत्सव अधिक उत्साहात व अडथळ्याविना साजरा होण्याची शक्यता आहे.
