माणदेश एक्सप्रेस न्यूज | प्रतिनिधी
श्रावण महिन्यातील पहिल्या सोमवारनिमित्त देशभरातील प्रमुख ज्योतिर्लिंगांमध्ये भाविकांची प्रचंड गर्दी झाली. महाराष्ट्रातील त्र्यंबकेश्वर (जि. नाशिक), परळी वैजनाथ (जि. बीड) आणि भीमाशंकर (जि. पुणे) या पवित्र तीर्थक्षेत्रांमध्ये पहाटेपासूनच भाविकांची दर्शनासाठी मोठी रिघ लागली होती. श्रद्धेच्या भावनांनी ओतप्रोत झालेली ही दृश्यं भक्तीभाव वाढवणारी ठरली.
त्र्यंबकेश्वर येथे पहाटेपासूनच भाविकांची रीघ
नाशिक जिल्ह्यातील त्र्यंबकेश्वर ज्योतिर्लिंग हे ब्रह्मा, विष्णू आणि महेश यांचा वास असलेले अद्वितीय तीर्थक्षेत्र मानले जाते. श्रावणातील पहिल्या सोमवारनिमित्त येथे पहाटे चार वाजल्यापासूनच दर्शनासाठी मंदिराचे दरवाजे भाविकांसाठी उघडण्यात आले. यावेळी विशेष महापूजा व अभिषेकही करण्यात आला. मंदिर परिसर विद्युत रोषणाईने उजळून निघाला होता.
परळी वैजनाथ – लाखो भाविकांनी घेतले दर्शन
बीड जिल्ह्यातील परळी वैजनाथ ज्योतिर्लिंग मंदिरातही भाविकांनी मध्यरात्रीपासूनच रांगा लावण्यास सुरुवात केली. मंदिर प्रशासनाने भाविकांच्या सोयीसाठी स्वतंत्र महिला व पुरुष रांगा, विशेष पास सुविधा आणि स्वयंसेवकांची तैनाती केली होती. मंदिराची सजावट ५ क्विंटल फुलांपासून करण्यात आली असून १३५ सीसीटीव्हीच्या सहाय्याने सुरक्षाव्यवस्था कडक ठेवण्यात आली आहे. प्रशासनाच्या अंदाजानुसार आज दिवसभरात १.५ लाखांहून अधिक भाविक दर्शन घेतील.
भीमाशंकर येथे सह्याद्रीच्या कुशीत लाखो भाविक
पुणे जिल्ह्यातील सह्याद्रीच्या कुशीत वसलेले भीमाशंकर ज्योतिर्लिंगही भाविकांनी फुलून गेले. मध्यरात्रीपासूनच लांबच लांब रांगा लागल्या होत्या. मंदिर प्रशासनाकडून दर्शनासाठी उत्तम नियोजन करण्यात आले होते. फुलांनी सजवलेले मंदिर आणि पहाटेच्या आरतीचा भक्तीमय अनुभव घेण्यासाठी राज्याच्या कानाकोपऱ्यातून भाविक येथे दाखल झाले होते.
श्रद्धेचा महापूर आणि शिस्तबद्ध दर्शन
या तिन्ही प्रमुख तीर्थक्षेत्रांवर लाखो भाविकांची गर्दी असूनही, चोख व्यवस्था आणि स्वयंसेवकांच्या समन्वयामुळे दर्शन सुरळीत पार पडले. महिला, वृद्ध आणि दिव्यांग भाविकांसाठी विशेष व्यवस्था करण्यात आल्याने समाधान व्यक्त करण्यात येत आहे.
