त्या अपघातानंतरच जुळलं प्रेमाचं सूत? कुठे भेटले प्राजक्ता गायकवाड आणि शंभुराजे?

माणदेश एक्सप्रेस न्यूज :-
मराठी मालिकांच्या दुनियेत प्राजक्ता गायकवाड हे नाव ऐकलं की डोळ्यांसमोर येतात महाराणी येसूबाई. ‘स्वराज्यरक्षक संभाजी’ मालिकेत या भूमिकेतून तिने महाराष्ट्रभर लोकप्रियता मिळवली. तिचं निरागस सौंदर्य, दमदार अभिनय आणि मोहक व्यक्तिमत्व यामुळे ती प्रेक्षकांच्या मनात घर करून बसली. पण अलीकडे ती चर्चेत आली ती तिच्या वैयक्तिक आयुष्यामुळे. नुकताच तिचा साखरपुडा पार पडला आणि चाहते तिच्या जीवनसाथीबद्दल जाणून घेण्यासाठी उत्सुक झाले.

‘लव्ह मॅरेज की अरेंज?’ – हा प्रश्न अनेकांच्या मनात होता. अखेर प्राजक्ताने एका वृत्तवाहिनीला दिलेल्या मुलाखतीत तिची आणि शंभुराजची कहाणी उघड केली. ही कहाणी अगदी एखाद्या चित्रपटाच्या कथेसारखी आहे – थोडा ड्रामा, थोडा अॅक्शन आणि भरपूर प्रेम!

१८ व्या वर्षीच स्थळं, पण आधी शिक्षण!

प्राजक्ता सांगते, “मी फक्त १८ वर्षांची असताना मालिकांमध्ये काम करू लागले. त्यावेळीच अनेक लग्नाची स्थळं यायला लागली होती, पण मला माझं शिक्षण पूर्ण करायचं होतं. त्यामुळे मी त्या गोष्टींकडे लक्ष दिलं नाही.”

तो दिवस बदलून गेला…

एका दिवशी प्राजक्ता नाईट शिफ्टसाठी सेटवर जात होती. त्याच दिवशी ती नवीन घर पाहण्यासाठीही बाहेर पडली होती. रस्त्यावर जात असताना अचानक एक ट्रक तिच्या कारला धडकला. प्राजक्ता प्रचंड चिडली आणि थेट ट्रक चालकाला मालकाला बोलावायला सांगितलं.

तेवढ्यात एक उंच, रागीट पण ठाम व्यक्ती तिथे आली – शंभुराज! कोणताही विचार न करता त्यांनी ट्रक चालकाला कानशिलात लगावली. ही घटना पाहून प्राजक्ता थोडी स्तब्ध झाली, पण त्याचवेळी तिच्या गाडीचे नुकसान आणि सेटवर वेळेत पोहोचण्याची चिंता तिला होती. हे लक्षात घेऊन शंभुराज स्वतः प्राजक्ताला सेटवर सोडायला गेले.

मैत्रीचे रूपांतर प्रेमात

त्या एका प्रसंगानंतर दोघांमध्ये बोलणे सुरू झाले. हळूहळू त्यांची भेटीगाठी वाढल्या. शंभुराज सुरुवातीपासूनच प्राजक्तेच्या प्रेमात होते, पण त्यांनी कधीच सरळपणे व्यक्त केलं नाही. ते नेहमी तिला मॅडम म्हणायचे. त्यांचा आदरयुक्त संवाद, मदतीची तयारी आणि प्रामाणिक वागणूक यामुळे प्राजक्ताही त्यांच्याकडे ओढली गेली.

कुटुंबाची संमती – प्रेमकथेला मिळाला मान्यता शिक्का

प्राजक्ताला नेहमीच कुटुंबाच्या संमतीने लग्न करायचं होतं. काही दिवसांनी तिने शंभुराजला घरी बोलावलं. दोन्ही कुटुंबांनी आपापसात चर्चा केली आणि लगेच होकार दिला. या दोघांच्या नात्याला दोन्ही घरच्यांचा आशीर्वाद मिळाला.

साखरपुड्याची धूमधडाक्यात सांगता

सर्व तयारीनंतर दोघांचा साखरपुडा मोठ्या उत्साहात पार पडला. प्राजक्ता आणि शंभुराजच्या या प्रेमकथेला चाहते सोशल मीडियावर भरभरून शुभेच्छा देत आहेत.