माणदेश एक्स्प्रेस न्यूज | मुंबई :
भारतीय जनता पक्ष (भाजप) सरकारवर पुन्हा एकदा टीकास्त्र सोडत शिवसेना (उद्धव बाळासाहेब ठाकरे) प्रमुख उद्धव ठाकरे यांनी “ऑपरेशन सिंधू” नावाच्या कथित लष्करी कारवाईवरून केंद्रावर सडकून टीका केली आहे. त्यांनी आरोप केला की, भाजप सरकार देशभक्तीचा व्यापार करत आहे आणि पाकिस्तानसोबतचे तणावपूर्ण वातावरण जाणीवपूर्वक राजकीय फायद्यासाठी वापरत आहे.
उद्धव ठाकरे म्हणाले की, “एकीकडे सरकार देशावर दहशतवादी हल्ले होत असल्याचे सांगते आणि दुसरीकडे युद्धजन्य वातावरण तयार केले जाते. पण त्याचवेळी क्रिकेट सामने पाकिस्तानसोबत खेळले जात आहेत. हे नेमके कोणते देशभक्तीचे राजकारण आहे?” असे सवाल त्यांनी उपस्थित केला.
अलीकडेच ऑलिम्पिक सुवर्णपदक विजेता भालाफेकपटू नीरज चोप्रा यांना ‘देशद्रोही’ म्हणत काही भाजप नेत्यांनी केलेल्या वक्तव्यांचा देखील ठाकरे यांनी समाचार घेतला. त्यांनी विचारले की, “जगभरात भारताचा गौरव करणाऱ्या खेळाडूंना देशद्रोही ठरवणारेच खरेतर देशद्रोही आहेत. जे खेळाडू देशाचे नाव उंचावतात त्यांना अपमानित करण्याचा अधिकार कोणाला दिला आहे?”
ठाकरे यांनी पुढे भाजपवर गंभीर आरोप करताना म्हटले की, “ज्यांच्यावर दहशतवाद्यांना समर्थन दिल्याचे आरोप आहेत, त्याच मंडळींना भाजप आपल्याजवळ ठेवते. देशभक्तीचे गोडवे गाणारेच आतंकवाद्यांशी सौदेबाजी करतात. हे दुहेरी धोरण जनता आता उघड्या डोळ्यांनी पाहते आहे.”
ठाकरे यांच्या या तीव्र वक्तव्यामुळे महाराष्ट्राच्या राजकीय वर्तुळात मोठी खळबळ उडाली आहे. भाजप नेते या आरोपांना काय प्रत्युत्तर देतात याकडे साऱ्यांचे लक्ष लागले आहे. राजकीय तज्ज्ञांच्या मते, आगामी निवडणुकीच्या पार्श्वभूमीवर ठाकरे यांची ही टीका महत्त्वपूर्ण ठरणार आहे.
