माणदेश एक्सप्रेस न्यूज | कुरुंदवाड
शिरोळ तालुक्यातील दत्तवाड गावात मित्रांमधील किरकोळ वादाने हिंसक वळण घेतले असून, अखेर त्या वादात एकाचा मृत्यू झाला आहे. दारूच्या वादातून झालेल्या कोयता हल्ल्यात जखमी झालेला बाळासो शामराव देसाई (वय ३७, रा. दत्तवाड) याचा शनिवारी (दि. १८ ऑक्टोबर) रात्री सांगली शासकीय रुग्णालयात उपचार सुरू असतानाच मृत्यू झाला. त्यामुळे या घटनेचा गुन्हा आता खुनामध्ये रूपांतरित करण्यात आला असून, आरोपी वाल्मीकी घडसे (रा. दत्तवाड) याच्याविरुद्ध खुनाचा गुन्हा दाखल करण्यात आला आहे.
ही धक्कादायक घटना शुक्रवारी (दि. १० ऑक्टोबर) रात्री दत्तवाड गावात घडली होती. पोलिसांकडून मिळालेल्या माहितीनुसार, मृत बाळासो देसाई आणि आरोपी वाल्मीकी घडसे हे दोघेही परस्परांचे जुने मित्र होते. काही दिवसांपूर्वी दारू पिण्याच्या विषयावरून या दोघांमध्ये वाद झाला होता. त्या वादात आरोपी घडसे याने देसाई याच्या कानशिलात मारल्याची घटना घडली होती. याच कारणाचा जाब विचारण्यासाठी देसाई शुक्रवारी आपल्या मित्र सुनील मगदूम याच्यासह घडसेच्या घरी गेला होता.
त्याठिकाणी दोघांमध्ये पुन्हा शाब्दिक वाद निर्माण झाला. हा वाद चिघळताच संतापाच्या भरात घडसे याने जवळ ठेवलेला कोयता उचलून देसाई आणि त्याचा मित्र मगदूम यांच्यावर प्राणघातक हल्ला केला. या हल्ल्यात दोघेही गंभीर जखमी झाले होते. त्यांना तातडीने सांगली येथील शासकीय रुग्णालयात उपचारासाठी दाखल करण्यात आले होते. परंतु बाळासो देसाई याची प्रकृती चिंताजनक राहून शनिवारी रात्री उपचार सुरू असतानाच त्याचा मृत्यू झाला.
या घटनेनंतर दत्तवाड परिसरात शोककळा पसरली आहे. मृत देसाई याच्या कुटुंबीयांनी आरोपीवर कठोर कारवाईची मागणी केली आहे. शिरोळ पोलिस ठाण्यात या घटनेची नोंद झाली असून, पोलिस कॉन्स्टेबल विवेक कराडे यांनी फिर्याद दिली आहे. त्यानुसार आरोपी वाल्मीकी घडसे याच्याविरुद्ध भारतीय दंड विधान कलम ३०२ (खून), ३२३, ५०४, ५०६ आणि शस्त्र कायद्यानुसार गुन्हा दाखल करण्यात आला आहे.
या घटनेचा पुढील तपास पोलिस निरीक्षक यांच्या मार्गदर्शनाखाली सुरू असून, आरोपीला अटक करण्यासाठी पोलिसांचे पथक शोध मोहिम राबवत आहे. दारूच्या वादातून एका जीवाचा बळी गेल्याने गावकऱ्यांमध्ये संतापाचे वातावरण आहे.
