माणदेश एक्स्प्रेस न्यूज | पुणे :
पुण्याचे आराध्य दैवत आणि देश-विदेशातील भाविकांचे श्रद्धास्थान असलेले श्रीमंत दगडूशेठ हलवाई गणपती यांची आगमन मिरवणूक मंगळवारी दुपारी दिमाखात पार पडली. “गणपती बाप्पा मोरया, मंगलमूर्ती मोरया” अशा घोषणांनी संपूर्ण पुणे भक्तिमय झाले होते. हजारो भक्तांच्या उपस्थितीत सजविलेल्या रथातून गणरायांची भव्य आगमन मिरवणूक काढण्यात आली.
मुख्य मंदिरापासून सुरू झालेल्या या मिरवणुकीत फुलांनी सजविलेला भव्य रथ सर्वांचे लक्ष वेधून घेत होता. रथावर भगवान पद्मनाभस्वामींची भव्य निद्रिस्त मूर्ती विशेष आकर्षणाचा केंद्रबिंदू ठरली. मार्गभर जयघोष, ढोल-ताशांचा गजर आणि भक्तांची गर्दी यामुळे वातावरण दुमदुमून गेले.
मुख्य मंदिर, अप्पा बळवंत चौक, शनिपार चौक, टिळक पुतळा मार्गे ही मिरवणूक जय गणेश प्रांगण येथे विसावली.
या वर्षी उत्सवासाठी जय गणेश प्रांगणात केरळमधील श्री पद्मनाभस्वामी मंदिराची प्रतिकृती उभारण्यात आली आहे. याठिकाणी मध्यप्रदेशच्या चित्रकुट येथील अनंत श्री विभूषित जगद्गुरु श्री रामानुजाचार्य श्री झालरिया पीठाधीश्वर स्वामी घनश्यामाचार्य महाराज यांच्या हस्ते गणेश प्राणप्रतिष्ठापना पार पडली.
यावेळी ट्रस्टचे अध्यक्ष सुनील रासने, उपाध्यक्ष डॉ. रामचंद्र उर्फ बाळासाहेब परांजपे, उपाध्यक्ष माणिक चव्हाण, कोषाध्यक्ष महेश सूर्यवंशी, सरचिटणीस व आमदार हेमंत रासने, सहचिटणीस अमोल केदारी, उत्सव प्रमुख अक्षय गोडसे यांच्यासह सुवर्णयुग तरुण मंडळाचे प्रकाश चव्हाण, यतीश रासने, सौरभ रायकर, तुषार रायकर, मंगेश सूर्यवंशी, अमोल चव्हाण, विनायक रासने यांची प्रमुख उपस्थिती होती.
मिरवणुकीत देवळणकर बंधूंचा चौघडा, गायकवाड बंधूंची सनई, तसेच दरबार बँड, प्रभात बँड, मयूर बँड आणि गंधाक्ष ढोल-ताशा पथक यांनी सहभागी होऊन कार्यक्रमाला भक्तीचा आणि जल्लोषाचा रंग चढवला.
२८ ऑगस्ट, गुरुवार पहाटे ६ वाजता : ऋषिपंचमी निमित्त तब्बल ३५ हजार महिला सामूहिकरीत्या अर्थवशीर्ष पठण करणार आहेत. यावेळी खासदार सुनेत्रा पवार आणि पुणे विभागाच्या धर्मादाय सहआयुक्त रजनी क्षीरसागर उपस्थित राहणार आहेत.
रात्री १० ते १२ : महाराष्ट्रातील वारकरी बांधवांचा हरीजागर व वारकरी गजर आयोजित करण्यात आला आहे.
दररोज पहाटे ५ पासून : महाअभिषेक पूजा होणार असून भाविकांना सकाळी ५ ते सायंकाळी ५ यादरम्यान स्वहस्ते अभिषेक करण्याची संधी मिळणार आहे.
सकाळी ८ ते दुपारी १२ : विद्वान मिलींद राहुरकर शास्त्री यांच्या उपस्थितीत गणेशयाग.
दुपारी १२ ते ४ : दाक्षिणात्य पद्धतीने नटराजशास्त्री यांच्या मार्गदर्शनाखाली विशेष गणेशयाग.
तसेच उत्सवांतर्गत सूर्यनमस्कार, अग्निहोत्र, वेदपठण, महिला हळदीकुंकू यांसारख्या विविध कार्यक्रमांचे आयोजन करण्यात आले आहे.
श्रीमंत दगडूशेठ हलवाई सार्वजनिक गणपती ट्रस्ट आणि सुवर्णयुग तरुण मंडळाच्या वतीने या वर्षी उत्सवाचे १३३ वे वर्ष साजरे केले जात आहे. भाविकांच्या उत्स्फूर्त सहभागामुळे या उत्सवाला यंदाही भव्यदिव्य रूप लाभले आहे.
👉 एकंदर, पुण्यातील सर्वात लोकप्रिय आणि ऐतिहासिक मानल्या जाणाऱ्या या उत्सवाची सुरुवात भव्य मिरवणुकीने झाली असून पुढील दहा दिवस भक्ती, उत्साह, धार्मिक विधी आणि सांस्कृतिक कार्यक्रमांनी पुणे शहर दुमदुमून जाणार आहे
