माणदेश एक्स्प्रेस न्यूज | पुणे :
“मी पोलिस बोलतोय, तुमच्यावर मनी लॉण्ड्रिंगचा केस दाखल झालाय!” – अशा प्रकारे पोलिस असल्याची बतावणी करून एका सायबर चोरट्याने पुण्यातील नागरिकाला जाळ्यात ओढले. होम अरेस्ट टाळण्यासाठी पैसे भरावे लागतील, अशी धमकी देत तब्बल २७ लाख रुपयांचा गंडा घातल्याची धक्कादायक घटना उघडकीस आली आहे.
ही घटना २८ जुलै ते ६ ऑगस्ट दरम्यान कोंढवा परिसरात घडली. याबाबत ५६ वर्षीय नागरिकाने कोंढवा पोलिस ठाण्यात तक्रार दाखल केली असून पोलिसांनी संबंधित मोबाईल क्रमांकधारकाविरोधात गुन्हा नोंदवला आहे.
काय घडले नेमके?
पोलिसांनी दिलेल्या माहितीनुसार, तक्रारदार हे कोंढव्यात वास्तव्यास आहेत.
२८ जुलै रोजी अज्ञात व्यक्तीने त्यांना फोन करून, “मी पोलिस अधिकारी बोलतोय,” असे सांगितले.
“तुमच्यावर मनी लॉण्ड्रिंगसारखा गंभीर गुन्हा नोंद झाला आहे. लवकरच तुम्हाला अटक होणार आहे,” अशी भीती दाखवण्यात आली.
“घरातच होम अरेस्ट करण्यात येईल, जर ते टाळायचे असेल तर तातडीने ठराविक खात्यावर रक्कम भरावी लागेल,” असे सांगत सायबर चोरट्याने दबाव आणला.
बदनामी आणि अटकेच्या भीतीमुळे तक्रारदाराने त्याच्या सांगण्यावर विश्वास ठेवला. त्यांनी काही दिवसांच्या कालावधीत टप्प्याटप्प्याने २७ लाख रुपये संबंधित खात्यावर वर्ग केले.
फसवणूक कशी उघडकीस आली?
सायबर चोरटा सतत आणखी पैशांची मागणी करू लागल्याने तक्रारदाराच्या मनात शंका आली. त्यांनी आप्तेष्टांशी चर्चा केली असता आपण मोठ्या फसवणुकीचे बळी ठरलो असल्याचे उघड झाले. त्यानंतर त्यांनी कोंढवा पोलिस ठाण्यात तक्रार दाखल केली.
पुढील तपास
या प्रकरणाचा तपास वरिष्ठ पोलिस निरीक्षक विनय पाटणकर यांच्या मार्गदर्शनाखाली सुरु आहे. पोलिसांकडून संबंधित मोबाईल नंबर आणि बँक खात्यांचा तपास केला जात आहे.
वाढत्या सायबर गुन्ह्यांमुळे इशारा
अलिकडच्या काळात पुण्यासह राज्यभरात सायबर फसवणुकीच्या घटनांमध्ये लक्षणीय वाढ झाली आहे. चोरटे कधी बँक अधिकारी, कधी पोलिस तर कधी सरकारी अधिकारी असल्याचे सांगून लोकांना जाळ्यात ओढत आहेत.
कोणत्याही अधिकाऱ्यांकडून फोनवर पैसे भरण्याची मागणी केली जात नाही, असे पोलिसांनी स्पष्ट केले आहे.
अशा प्रकारचा फोन आल्यास त्वरित पोलिस हेल्पलाइनवर संपर्क साधावा, असे आवाहनही करण्यात आले आहे.
